كنت تحدثت توة نهارين إلتالي على موضوع التنافس بين مؤسستين لتمثيل الصحفيين... و توصلت لخلاصات من أهمها إلي "جمعية الصحفيين" قاعدة ترد في الفعل على "نقابة الصحفيين" و ما فكرت في تحويل "الجمعية" الى نقابة و في تنظيم مؤتمر إلا بعدما قامت "النقابة" تحت التأسيس بإقناع كثير من الصحفيين بحاجتهم لنقابة و بعدما نجحت في ضمان دعم الاتحاد العام التونسي للشغل (إلي هو الاطار النقابي العامي في تونس)... الجمعة إلي فاتت إتحاد الشغل أعلن عزمو تنظيم مؤتمر النقابة في 28 أكتوبر (أنظر في التدوينة السابقة أو على موقع جريدة الشعب)... آخي "الجمعية" عملت اجتماع و أعلنت إلي هي بش تأسس نقابة في اجتماع نهار 26 أكتوبر (يعني اليوم) في محاولة لاستباق مشروع نقابة اتحاد الشغل (أنظر بيان الجمعية في الصورة الفوق و النص في التدوينة السابقة).... يبدو أن القرار هذا ظهر كاينو فيه دعم من قبل بعض الأطراف لنقابة تأسسها الجمعية... فما كان من إتحاد الشغل إلا إصدار بيان (وصلتني منو نسخة منذ قليل... أنظر الصورة الفوق) يلغي فيها المؤتمر متاع 28 أكتوبر (في الحقيقة هو يقول "تأجيل" لكن ما يحطش آجال للتأجيل)... حتى هذه اللحظة يبدو أنو اليوم بش يقع الاعلان على أول نقابة للصحفيين من قبل "جمعية الصحفيين" يبدو أنها تحظى بدعم رسمي ... تكون "مستقلة" على اتحاد الشغل... فهل ستنجح هذه التجربة؟ خاصة أن هناك على ما يبدو تجاذب قوي بين الصحفيين حول الموضوع (يقال أن بعض الصحفيين استقالو من "الجمعية" بفعل نيتها في استباق مؤتمر النقابة)؟ و خاصة إلي "الجمعية" حتاش للحظة هذية ما قامتش بمبادرات كافية لإظهار صدقها في الدفاع عن المصالح المادية للصحفيين إلا في شكل ردود أفعال وقتية على قرار جانب من الصحفيين لإنشاء نقابة؟