ربما البعض منكم يعرف شبكة فايسبوك إلي غالبية الطلبة في أمريكا موجودة فيها... على كل حال فمة برشة مجموعات في فايسبوك... و تكوين المجموعات هذية في فايسبوك تحول من ظاهرة جدية ("نضالية") في بعض الاحيان الى ظاهرة كوميدية و متاع جو بالأساس... و هذاية يعكس بشكل عام التبرم متاع الطلبة الأمريكان من السياسة و مللهم من السياسيين و الخطابات "النضالية"... الاتجاه هذاية تقابل مع ظاهرة أخرى كوميدية في أمريكا شعبيتها كبرت في الاعوام لخرة و إلي هي ظاهرة الكوميديا الاخبارية (كوميدي نيوز)... و هذية ظاهرة تزامنت في بدايتها مع جياني لهنا و تابعتها من بدايتها و تغرمت بيها برشة خاصة أنها تتعدى في الليل امخر و أنا من احباء البرامج متاع "اللايت نايت شووز"... على كل حال الظاهرة هذية بدات كردة فعل على السطحية و الانتقائية متاع معظم البرامج الاخبارية الأمريكية خاصة متاع القنوات الاخبارية التجارية (كيف سي أن أن و فوكس نيوز)... من الاول بدات من خلال برنامج يقدمو ممثل كوميدي "ذو ديالي شوو ويذ جون ستيوارت" (الكوميدي شانال).... إلي عملو جون ستيوارت هو أنو قام بتقديم برامج يحاكي فيها البرامج الاخبارية "الجدية" و لكن في الحقيقة يقوم بالتهكم عليها و فضح سطحيتها... بالشوية بالشوية البرنامج كبر و ولى ينافس في البرامج الخبارية بالحق حتى أنو فمة استطلاعات تقول إلي الناس ولات في الغالب تتفرج في الاخبار متاع جون ستيوارت... من أهم الاشياء إلي قام بيها ستيوارت زادة أنو ركز في التقد متاعو على ظاهرة قناة "فوكس" الاخبارية إلي أخبارها منحازة بشكل فاضح لليمين.. برز الصراع هذاية في الحرب على العراق... و للمفارقة برنامج ستيوارت ولى في الوقت هذاكة (قبل و مباشرة بعد الحرب) من البرامج النادرة إلي يقع فيها نقد قرار الحرب و فضح المبررات متاعو... طبعا هذا الكل يتم بشكل فكاهي و خذى عليه برشة جوايز كبيرة في أمريكا....
من بين المشاركين في برنامج جون ستيوارت كان ممثل مغمور اسمو ستيفين كولبرت... بالشوية بالشوية كولبرت عمل شعبية و في النهاية ولى عندو برنامج متاعو يتعدى مباشرة بعد برنامج جون ستيوارت يعتمد نفس الفكرة لكن بطريقة أكثر كوميدية: إلي عملو كولربت أنو خذى كنموذج برنامج مشهور لمذيع مشهور في فوكس نيوز يميني متطرف برشة اسمو بيل أورايلي و بدى كولبرت يقلد في البرنامج هذاية بهدف أنو يشلكو... من الاول وقع تجاهلو.. لكن بسرعة ولات عندو شعبية.. حتى أنو بيل أورايلي اضطر أن يستدعي كولبرت لبرنامجو (و طبعا صارت عركة بيناتهم و تشليك متبادل... فيديو الحلقة الفوق) و قبل دعوة كولربت (كيف كيف تشكليك متبادل).... كولبرت وصل لأكث من هكاكة بأنو أدى بالبيت الابيض لقبول استدعاؤو لحفلة رسمية (الاجتماع السنوي متاع المراسلين الصحفيين في البيت الابيض) بش يتكلم فيها قدام الرئيس بوش و تنجمو تتخيلو شنوة حصل (فيديو الكلمة متاعو الفوق على جزئين)... المهم كولبرت توة تفوق حتى على برنامج جون ستيوارت في عدد المشاهدين لأنو استعمل بشكل فعال الانترنت للتفاعل مع جمهورو... و مثلا توة أسرع مجموعة قاعدة تكبر في فايسبوك هي المجموعة متاع ستيفين كولبرت بهدف ترشيحو للانتخابات الرئاسية القادمة (؟؟!!).. هذاية مجرد مثال واحد على الشعبية هذية... و هذاية الكل طبعا ردة فعل على البرامج الاخبارية بودورو
بالمناسبة يمكن الاطلاع في موقع خاص في الانترنت (تابع قناة كوميدي شانال) على حلقات من برنامج جون ستيوارت و ستيفين كولبرت
"I believe a gouvernment that gouverns best is the gouvernment that gouverns least. An by these standards, we set a fabulous gouvenrment in Iraq" => LOOOOOL
J'ai bien aimé la théorie du verre à 2/3 vide aussi.
Sinon, dans Comedy Central il y a une autre série qui est fortement satirique: il s'agit de "South Park" (dont la 11ème saison a repris il y a quelques semaines). Je trouve que, malgré le caractère très vulgaire de cette série, elle fait partie des meilleures emissions critiques que j'ai jamais regardé. Tous les épisodes ce cette séries sont disponibles sur http://allsp.com/.
Pour l'anecdote, quand un ami m'a fait decouvrir cette série il y a un peu plus d'un an, je l'ai tellement appréciée que j'ai regardé 10 saisons en moins d'un moins :-D
إي طبعا يا بشير نعرف ساوث بارك... أما ما نعرفش ساعات ما نجمش نضحك... ما نعرفش علاش ما نجمش نقبل أنو صيغة الكرتون تكون بمحتوى متع كبار... كيفها كيف السيمبسون... على كل هذية أمور أذواق.. أما يلزمك تتفرج في حلقات جون ستيوارت و ستيفن كولبار
Hilarious :))
brabbi it5ayylou ijebali wzaba fard sahriyya?!!
إرسال تعليق