في الوقت إلي فمة أزمة "عيش" (خبز) تحشم (هنا)... في خضم الأحاديث عن غطاء ديني (سلفي وهابي) لتوريث الحكم لجمال مبارك (هنا)... في الوقت إلي غاب فيه الرئيس المصري عن القمة الدورية في دمشق وقتلي حضر في معظم الدورات السابقة و وقتلي هو إلي بادر بمأسسة القمة الدورية وسط اتهامات بـ"رضوخ القيادة المصرية لضغوط خارجية " في قرارها عدم حضور قمة دمشق (الحقيقة مانجمش نرى الغياب نتيجة ميكانيكية لـ"ضغوط خارجية" لأنو الضغوط هذية ديما موجودة و القيادة المصرية ماتنفذش ديما كل ما يطلب منها من الدوائر الخارجية المعنية... و زيد المسألة ماعندهاش علاقة بتموقع مصري في الصف المناهض لإيران لأنو قبل مدة قصيرة نائب الرئيس الإيراني زار القاهرة و فمة اتفاق مبدئي على عودة العلاقات... لكن هذا موضوع آخر).... عادة في الوقت الحساس هذاية تتفاقم الأزمة الإقتصادية في مصر بشكل خطير...

الفقرة هذية (هنا) من برنامج "القاهرة اليوم" متاع عمرو أديب (قناة أوربيت) مجرد مؤشر بسيط لكنو معبر برشة علي قاعد يحصل في مصر... السؤال إلي طرحوه المذيعين هو: هل تنجم توكل عايلة من خمسة أفراد بخمستاش (15) جنيه في النهار؟

للتذكير فإنو الدينار التونسي يساوي حوالي 4.7 جنيه مصري و 15 جنيه يجيو حوالي 3 آلاف مليم...  و بش ناخذو فكرة أوضح على الموضوع يلزم نقارنو معدلات الأجور... مثلا المتخرج الجديد من الجامعة في اختصاص رفيع مثل الطب يخلص كيف يخدم في مستشفى حكومي (و مش ساهل بش تخدم في مستشفى حكومي في مصر)... شدو رواحكم... 220 جنيه في الشهر يعني 45 دينار تونسي (هنا).... بالعربي "الطبيب" إلي عندو عايلة فيها خمسة أفراد بش يوكلهم بثلاث آلاف فرنك في النهار يلزم يخلص على الأقل 90 دينار هذا بش يصرف على الماكلة أكهو و الباقي الكل يلزم يكون خالص بما فيها مصاريف النقل و السكن و الصغار.... المعضلة إلي كيف شفتو في التقرير متاع برنامج "القاهرة اليوم" مش ساهل توكل خمسة من الناس في النهار بخمستاش جنيه أكهو!

الناس في مصر تشري في الخبز بالأكتاف و تشري في عظم اللحم بـ 2 جنيه العظمة... هذية مقدمات خطيرة لأزمة متفاقمة بش تزيد تتفاقم مع تزايد الأسعار العالمية للحبوب و النفط

أزمة إقتصادية كبيرة في مصر في ظرفية متاع غموض مستقبل الحكم و وسط حديث (ربما مبالغ فيه ساعات لكن ماهوش غالط تماما) عن "أيام مبارك الأخيرة" (هنا)... سؤال من الأسئلة إلي انجمو نطرحوها: هل الوضعية الراهنة تساعد مسار توريث الحكم ("جمال كمنقذ") و إلاتصعبها ("إضطراب اجتماعي يتم استثمارو سياسيا من قبل أعداء التوريث")؟ الجواب في الوقت الراهن يظهر صعيب برشة.. كان مش مستحيل... و هذاية وحدو يعبر على عمق الغموض إلي حاصل

طبعا فمة شكون ما ينجمش يفهم علاش مهم الحديث عن مصر و أزمتها بخلاف أنو واحد يتحدث على حاجة "غريبة" و "تسخف"... يلزم نعترفو بكل أمانة إلي وضع مصر كان عندو دور كبير في صياغة وضع المنطقة العربية بشكل عام... أية تطورات خطيرة في مصر بش يكون عندها بالضرورة تأثيرات كبيرة و لو بشكل متفاوت و ساعات بأشكال غير مباشرة على بقية محطيها الجغراسياسي خاصة العربي.... مصر تحتاج للانتباه... الانتباه الشديد زادة


عدد التعاليق: 2

    تعليق: Bechir ...  
    31 مارس 2008 في 1:43 ص

    شكرا يا طارق على الموضوع هذا. الحقيقة "القاهرة اليوم" عرى برشة حوايج مخبية في مصر. خسارة ما عندناش برنامج كيفو في تونس.

    بالنسبة لموضوع "العيش"، يبدو انو ثمة محاولة لحل الأزمة (وقتياً على الأقل) عن طريق إنتاج الخبز بواسطة قوات الشرطة و الجيش زادة:

    http://youtube.com/watch?v=PS8_Ikgb7pQ

    الخبر هذا حسب رايي هو خبر باهي من زوز نواحي:

    1- من الواضح كيما قالت المذيعة في التقرير اللي حطيتو إنت انو المصريين نوابغ في إستنباط الحلول الغير نمطية وهذا حسب رايي باش تكون عندو آثار إيجابية على المدى الطويل.

    2- حسب ما فهمت من حديث المسؤولين، المبادرة هذي هي مبادرة نابعة من وزارة الداخلية (يعني موش مملاة على وزارة الداخلية من أعلى هرم في السلطة). وقت تولي المؤسسات في البلدان متاعنا عندها هامش متاع إبداع كيما هكة (حتى كيف نبداو بمسألة بسيطة كيما إنتاج الخبز)، أنا نشعر بالتفاؤل...

    أرجو أن تزول هذه الأزمة سريعاً...

    ا


    تعليق: Big Trap Boy ...  
    31 مارس 2008 في 4:10 ص

    تي ماهم هزّو كأس إفريقيا للأمم، آش مازالو يحبّو؟ لازمهم الخبز زادة؟

    :))



طارق الكحلاوي
نشأ طارق في أحد مدن الضواحي مدينة رادس الواقعة في الجمهورية التونسية. يشغل الآن موقع أستاذ في جامعة روتغرز (قسمي التاريخ و تاريخ الفن). تلقى طارق تكوينه الجامعي في جامعة تونس (كلية 9 أفريل، إجازة و دراسات معمقة في التاريخ و الآثار) و جامعة بنسلفانيا (رسالة دكتوارة في تاريخ الفن). و يعلق بانتظام على القضايا و الاوضاع العربية باللغتين العربية و الانجليزية في مواقع و صحف مثل "الجزيرة.نت" و "القدس العربي" و "الحياة" و "العرب نيوز" و "ميدل إيست أونلاين"، و يكتب عمودا أسبوعيا في جريدة "العرب" القطرية. يكتب أيضا في قضايا ثقافية و نظرية تخص الاسلام المعاصر في المجلة البيروتية "الآداب". و تمت استضافته للتعليق في قناة "الجزيرة الفضائية" و قناة 13 "بي بي أس" (نيويورك).

Tarek Kahlaoui
Tarek grew up in the suburban city of Rades in Tunisia. He is currently an Assistant Professor at Rutgers University (a joint position in the Art History and History departments). Tarek graduated from the University of Tunis (Bach. and DEA in history and archeology) and University of Pennsylvania (Ph.D. in history of art). Tarek also comments regularly in Arabic and English on Middle Eastern issues and politics in Aljazeera.net, Al-Quds Al-Arabi, Al-Hayat, Arab News, and Middle East Online, and writes a weekly column for the Qatari newspaper Al-Arab. He also writes on intellectual and theoretical issues related to contemporary Islam in the Lebanese magazine Al-Adab. He was also invited to comment in Al-Jazeera Channel, and in Channel 13 (PBS-New York).