في مصر توة أزمة متاع "عيش" (خبز بالعربي) تعمل العار... لتوة في مصر فمة "طوابير" بش الناس توقف من صباح ربي بش في لاخر شوف تلقى و شوف ما تلقاش شوية "عيش"... ملا عيشة؟ آخر ما جرى مواطن مصري "استشهد" في الجبهة متاع "الطوابير" هذية بالدزان و العرك....

طبعا نحنا في تونس الوضعية الاقتصادية و الاجتماعية متاعنا ما تتقارنش بالوضع المأساوي إلي في مصر... هذاية مش رمي ورود و لكنها الحقيقة.. مثلا للناس إلي ما تعرفش فإنو الطبيب لإلي يخدم في مستشفى حكومي مصري الشهرية متاعو ما تزيدش علاش 150 جنيه!!! يعني مهزلة... يعني أزمة "العيش" هي مجرد مؤشر على أزمة متاع عيش (حياة) كريمة في مصر... فشل كبير حسب رايي ما ينجمش يعوضو المصاريف المذهلة متع الحكومة المصرية في حكايات فارغة تعكس الهوس بأسطورة "مصر أم الدنيا": مثلا القمر الصناعي و "آلاف" القنوات الإاعية و التلفزية تقولش عليك في أمبراطورية تغزو في العالم.... لكن يلزم التنبيه إلي أزمة "العيش" ناتجة عن أزمة عالمية في الحبوب و أنو كل "البلدان النامية" بما فيها تونس متأثرة بالضرورة بالأزمة هذية... فمة مقال متوازن متاع الصحفي صالح عطية متاع جريدة الصباح في صحيفة قطرية (هنا) يعطينا فكرة على المسألة هذية.... أرجو أنو من دون المبالغة في الموضوع هذاية أو تسييسو أنو يقع تجاوزها.. على خاطر حتى حد نتصور ما يتمنى أزمة في المستوى هذا... و طبعا المشكلة مش في الخبز فقط لأنو أي إرتفاع بش يمس مواد أساسية في "صحن" أي تونسي بما في ذلك "المقرونة" (و ما أدراك من المقرونة) و بقية أنواع العجين... و نعتقد في الإطار هذاية إلي السياسة الحالية يعني سياسة التدرج في رفع الدعم هي السياسة الصحيحة مش سياسة الرفع الفوري متع الدعم المطلوبة من صندوق النقد الدولي...


عدد التعاليق: 4

    تعليق: Clandestino ...  
    16 مارس 2008 5:29 م
    أزال المؤلف هذا التعليق.

    تعليق: Clandestino ...  
    16 مارس 2008 5:35 م

    احنا في تونس قادمين على مرحلة صعيبة ياسر
    و ازمة الحليب هذيكة المقدمة الاول للي باش يصير

    تعرف يا طارق اللي توة بأقل من مليون تنجم تاخذ بقرة حلوب و من فصيلة باهية؟؟
    العلوش كذلك طاحت الاسعار متاعو بصفة غريبة ....حق العلوش الواحد ولى يجيبلك زوز...
    و مانحكيش على اصحاب المداجن و الازمة اللي يعانيو منها... وصلوا هددو بالتصرف في المخزون الاستراتيجي متاع العضم (ايه ماهو عنا ترسانة متاع عضم ) المخصص لشهر رمضان لأانو الـ500 فرنك حق الحارة حاليا ماعادش تخلص مربي الدواجن

    تعرف الناس الكبار يقارنو الفترة هاذي بفترة التعاضد وقت اللي كل شي رخيص و الناس الكل تحب تبيع و ما فماش شكون يشري
    يحكيو داخل الجمهورية اللي فمة الاف الفلاحين ضيعت رؤوس اموالها لأنو ما ينجموش يتحملوا مصاريف الاعلاف متاع القطعان متاعهم و في نفس الوقت مضطرين يبيعو باش يلقاو اش يصرفو على ارواحهم و بقية القطيع و مع ارتفاع الاسعار...و الغريب انو اسعار اللحم عند الجزار مازالت هي بيدها....


    تعليق: zabratfromgeneva ...  
    16 مارس 2008 6:23 م

    Quand j etais en Egypte j etais choque par le clivage des societes.
    Il y en a deux qui vivent aux antipodes l'une de l'autre.
    Je parlais a des avocats qui etaient etonnes que je mangeais deux fois de la viande par jour alors qu il n'en avaienent droits qu une fois par mois.
    Mais quand tu vas a Ezzamelek ou al Mohandissin ou a Sharam tu te croirai a Beverly Hills ou a Neuilly


    تعليق: Slaim ...  
    16 مارس 2008 7:20 م

    ya3tik essa7a ya tare9, mawdhou3 fi 3'ayet il ahamiyya, baraka allahou fik 3al video zada, il mawdhou3 yist7a99 tadweena koll yoom



طارق الكحلاوي
نشأ طارق في أحد مدن الضواحي مدينة رادس الواقعة في الجمهورية التونسية. يشغل الآن موقع أستاذ في جامعة روتغرز (قسمي التاريخ و تاريخ الفن). تلقى طارق تكوينه الجامعي في جامعة تونس (كلية 9 أفريل، إجازة و دراسات معمقة في التاريخ و الآثار) و جامعة بنسلفانيا (رسالة دكتوارة في تاريخ الفن). و يعلق بانتظام على القضايا و الاوضاع العربية باللغتين العربية و الانجليزية في مواقع و صحف مثل "الجزيرة.نت" و "القدس العربي" و "الحياة" و "العرب نيوز" و "ميدل إيست أونلاين"، و يكتب عمودا أسبوعيا في جريدة "العرب" القطرية. يكتب أيضا في قضايا ثقافية و نظرية تخص الاسلام المعاصر في المجلة البيروتية "الآداب". و تمت استضافته للتعليق في قناة "الجزيرة الفضائية" و قناة 13 "بي بي أس" (نيويورك).

Tarek Kahlaoui
Tarek grew up in the suburban city of Rades in Tunisia. He is currently an Assistant Professor at Rutgers University (a joint position in the Art History and History departments). Tarek graduated from the University of Tunis (Bach. and DEA in history and archeology) and University of Pennsylvania (Ph.D. in history of art). Tarek also comments regularly in Arabic and English on Middle Eastern issues and politics in Aljazeera.net, Al-Quds Al-Arabi, Al-Hayat, Arab News, and Middle East Online, and writes a weekly column for the Qatari newspaper Al-Arab. He also writes on intellectual and theoretical issues related to contemporary Islam in the Lebanese magazine Al-Adab. He was also invited to comment in Al-Jazeera Channel, and in Channel 13 (PBS-New York).