قالولي قبيلة فمة ماتش كورة في تونس 7 عادة قلت نعمل طلة.. أما يظهرلي خلطت امخر... على كل حال لقيت حوالي الساعة الخامسة توقيت تونس برنامج تنشط فيه هالة الركبي حول (من دون البلايص الكل و في الوقت هذا بالذات) حول قفصة و بالتحديد حول شباب قفصة و التشغيل (البرنامج محطوط عليه "إعادة" يعني تعدى مباشر في وقت سابق مانعرفش وقتاه بالضبط)... من بين الفقرات إلي فيه فنان تشيكلي علقت الركبي على لوحاتو بأنها "تزرع الحلم عند شباب قفصة".... فقرة أخرى كان فيها حوار مع فنان تشكيلي آخر و كيفاه هو ناجح في الميدان متاعو.... فقرات أخرى غنائية "رومنسية" (ظلمو الاستوديو و شعلو البريكيات كيفما طلبت الركبي من الجمهور) من قبل مغنين قفاصة... فقرة أخرى حول البنية التحتية (مطار قفصة و الطرق) و دورها في إمكانية تنمية السياحة بالجهة و حوار مع مسؤول محلي حول السياحة بقفصة حول أنو فمة أسس السياحة الكل إلا أنو قفصة قعدت "منطقة عبور" متاع سياحة... السؤال متاع الركبي: "مالا شنوة إلي مش موجود؟"... جواب المسؤول (مندوب جهوي): "المبادرات الخاصة... الدعاية للجهة..."، الركبي علقت: "يلزم إذا أهالي قفصة يساهمو بالتنشيط...".... في الأثناء المندوب خلط مرة و قال إلي "توزر عندها مستقبل في السياحة"... صلحتلو الركبي قتلو "تقصد قفصة؟"... ثم فقرة على نجاحات شبابية أخرى و خاصة (طبعا) نجاح الشباب القفصي في الرياضة و بالتحديد في كرة القدم.... بدات الفقرة هذية بالجملة التالية: "شباب قفصة شباب حي و يحب الحركية".... و هذية طبعا ملاحظة كان من الضروري أنها تقولهانا الركبي على خاطر ماكناش نعرفو المعطى المهم هذاية... على كل الفقرة تعدي صور من الجمهور متاع قفصة في إطار تشجيعو لفريق قوافل قفصة... طبعا الفريق جل عناصرو من خارج قفصة كيفما هو معروف و هي حالة متوقعة و تخص كل الفرق متاع البطولة... ما يلمنيش ننسى الفقرة متاع رقص "الشباب القفصي" على موسيقى الهيب هوب...

على كل حال... هذية عينة من "السهرية" هذية حول قفصة إلي طبعا كي تجي في الظرف الراهن مش مجرد صدفة... مشكل تغطية التلفزة للوضع في قفصة خاصة الوضع المتأزم الراهن مشكل واضح و هو الموقف مش متاع "اطراف مغرضة" و لكن حتى متاع ناس مقربة من الدوائر الرسمية كيفما قلت في أول مارس في آخر التدوينة هذية.... القصور الإعلامي هذا يولي مشكل متضاعف كي يحاول أنو يركز على إيجابيات حتى حد ما ينكرها و يجعلها ستار لعدم الحديث عن مشكلات حقيقية مش ممكن تجاوزها من خلال تجاهلها... و المشكل لاخر طبعا أنو الناس إلي يقع تجاهلها تعمق فيها الرغبة في ممارسات يائسة و متمردة... ما ظاهرلي هذاية استنتاج يحتاج لعلم اليدن بش نتوصلولو... ما نعرفش برنامج كيف هكة شنوة الهدف منو؟ أهل قفصة إلي في أقل الأحوال بش يبدلو القناة كان ما يعملوش حاجة أخرى؟ 

سهرية كيف هكة تجي في وقت حملة "الحوار مع الشباب"... كنت كتبت على الموضوع هذاية (هنا و هنا) و ريت شخصيا أنو من الضروري أنو الشباب يشارك في المنتدى إلي تحل لأنو هذية فرصة للحوار بين الدولة و الشباب... و بالوقت و بالرغم بعض الناس تشاءمت من الموقف متاعي إلا أنو مدونين أخرين شاركو في المنتدى (خليل مثلا هنا) و أخرين كتبو في نفس الاتجاه من أجل المشاركة مش الوقوف على الربوة (بيغ و فري)... و هذاية دليل أنو على الأقل الشباب متاع المدونات يتصرف بشكل إيجابي و أنو يرغب فعلا في الحوار و مش في الصراخ الفارغ... لكن في نفس الوقت الواحد يتساءل كيفاش ينجم يصير حوار مع شباب يحس نفسو مهمش و في وضع اقتصادي صعيب ياسر وقتلي يشوف الأسلوب متاع ناس كيف الركبي إلي يتحدثولهم عن بديل الفن التشكيلي و تشجيع فريق قوافل قفصة للخروج من وضعهم الراهن؟ 

لكن برغم هذاكة خليني نكون واضح لهنا: الوضع في قفصة مايلزمش يقع تناولو بشكل شعبوي احتجاجي متاع بيانات و تصفية حسابات سياسية.... يلزم يكون فمة نقاش جدي حول موضوع أزمة البطالة و علاش هي أكثر في جهات دون أخرى... يلزم نشوفو شنوة دور الوضع الاقتصادي العالمي الصعيب في نسب البطالة في بلادنا و الارتفاع العالمي للأسعار و بين العوامل المحلية الخاصة بينا... بالنسبة لقفصة بالذات يلزم يتجبد موضوع علاقة الخريطة العشائرية توزيع مواقع العمل و النفوذ و هل الصيغة هذية مازالت تصلح في إطار الوضع الراهن.... فمة برشة أسئلة إلي لا تكرر الخطاب المدعوك و لا تقوم بتسجيل نقاط سياسية... أنا نتمنى إلي شباب قفصة يشارك في حملة "الحوار مع الشباب" و هذا ما يعنيش رفض حقو في الاحتجاج... و لو أنو مانعرفش هل عندو أصلا كونيكسيون متاع انترنت في بلايص كيف الرديف و أم العرايس بش ينجم يشارك


عدد التعاليق: 6

    تعليق: malek ...  
    10 أفريل، 2008 12:58 م

    المفيد يا طارق. منطقة الحوض المنجمي بقفصة جنّة على وجه الأرض و ناسها موش عارفين. توّه هذا موش قحب


    تعليق: malek ...  
    10 أفريل، 2008 12:58 م

    المفيد يا طارق. منطقة الحوض المنجمي بقفصة جنّة على وجه الأرض و ناسها موش عارفين. توّه هذا موش قحب


    تعليق: أنيس ...  
    11 أفريل، 2008 3:25 ص

    أنا منيش فاهم إلتوٌ كيفاش المسهولين ما شافوش إلي نهار من نهارات المُشكلة متع البطالة و التنمية في مناطق الظل بش تُخرج للشارع
    كيفاش تونس (المُصدٌر الرابع في العالم متع الفُصفاط) نسات باش تنمٌي هل المدينة ؟؟
    ثم هالهالة الركبي كان جات الدنية دنية راهوا طردوها من هاك العام للطحين المُفرط الي تسيب فيه


    تعليق: mandela ...  
    11 أفريل، 2008 4:34 ص

    Canal du Dialogue Tunisien: Média d'expression de l'opposition démocratique et progressiste tunisienne. Informations, dossiers et débats sur les luttes politiques, sociales et culturelles en Tunisie.

    Canal du Dialogue est animé par un groupe de militants issus de différentes tendances de l'opposition démocratique et progressiste tunisienne. Le groupe est réuni autour des objectifs de démocratie politique, de progrès social et de lutte contre toutes les formes de fanatisme et d'intégrisme religieux. Les activités de Canal du Dialogue sont entièrement financées par ses animateurs.

    http://www.arcoiris.tv/modules.php?op=modload&name=Downloads&d_op=viewdownload&cid=1045


    تعليق: Werewolf ...  
    11 أفريل، 2008 11:04 م

    قبل ما الواحد يحكم يلزم يحاول يفهم و يعطي لكل حاجة فرصتها... لكن مضمون البرنامج معروف بالمسبق و كيما قلت انتي اختيار ولاية قفصة موش صدفة و هالة الركبي بالذات عطيتها فرصتها برشة مرات و مانجمشي نزيد نو سع بالي معاها لكن انتي منين جبت قوة الأعصاب و الصبر اللي خلاك تتفرج في البرنامج بجميع فقراتو... جاب ربي حبيت تتفرج في ماتش كورة و تتفرهد شوية... فيما يخص وقت البث يا سيدي البرنامج تعدى نهار السبت في الليل معناها البرايم تايم... و رغم ذلك أنا متأكد اللي ثمة شكون سمع بيه مالمدونة متاعك أكهو


    تعليق: Clandestino ...  
    12 أفريل، 2008 5:45 ص

    @tarek:
    هههه
    انا زادة تفرجت في المهزلة متاع هالة الركبي اللي بالمناسبة تختفي سنوات و تعاود تظهر قبل الانتخابات بعام باش تدور في الجمهورية و تعدد الانجازات و تثمنها...
    @malek:
    فعلا هذاكة هو .."اللي قلت عليه"
    و ازرق اللون زادة



طارق الكحلاوي
نشأ طارق في أحد مدن الضواحي مدينة رادس الواقعة في الجمهورية التونسية. يشغل الآن موقع أستاذ في جامعة روتغرز (قسمي التاريخ و تاريخ الفن). تلقى طارق تكوينه الجامعي في جامعة تونس (كلية 9 أفريل، إجازة و دراسات معمقة في التاريخ و الآثار) و جامعة بنسلفانيا (رسالة دكتوارة في تاريخ الفن). و يعلق بانتظام على القضايا و الاوضاع العربية باللغتين العربية و الانجليزية في مواقع و صحف مثل "الجزيرة.نت" و "القدس العربي" و "الحياة" و "العرب نيوز" و "ميدل إيست أونلاين"، و يكتب عمودا أسبوعيا في جريدة "العرب" القطرية. يكتب أيضا في قضايا ثقافية و نظرية تخص الاسلام المعاصر في المجلة البيروتية "الآداب". و تمت استضافته للتعليق في قناة "الجزيرة الفضائية" و قناة 13 "بي بي أس" (نيويورك).

Tarek Kahlaoui
Tarek grew up in the suburban city of Rades in Tunisia. He is currently an Assistant Professor at Rutgers University (a joint position in the Art History and History departments). Tarek graduated from the University of Tunis (Bach. and DEA in history and archeology) and University of Pennsylvania (Ph.D. in history of art). Tarek also comments regularly in Arabic and English on Middle Eastern issues and politics in Aljazeera.net, Al-Quds Al-Arabi, Al-Hayat, Arab News, and Middle East Online, and writes a weekly column for the Qatari newspaper Al-Arab. He also writes on intellectual and theoretical issues related to contemporary Islam in the Lebanese magazine Al-Adab. He was also invited to comment in Al-Jazeera Channel, and in Channel 13 (PBS-New York).