خبر إقالة طارق ذياب متأكد.. خرج بيان رسمي و تنشر في الجرايد مثلا في الصباح متاع البارح (هنا)... لكن إلي مش واضح هو سبب الإقالة... المعضلة إلي فمة بعض المواقع التونسية و العربية نشرت خبر نقلا على السي أن أن (الموقع العربي) يذكر عدم مصافحة طارق ذياب لوزير الرياضة كسبب متاع الإقالة (شوف التصويرة متاع بحث القوقل الفوق)... المشكل إلي وقتلي بحثت على الخبر في موقع سي أن أن ما لقيتوش... موقع يلاكورة إلي كان من بين المواقع إلي نشرت الخبر من الاول نقلا على سي أن أن نشر خبر آخر معدل شوية مبعد (تحت ملاحظة "محدث" updated) فيه رواية تتحدث على "تهجم على الوزير و سلطة الاشراف" (هنا)... يظهرلي فمة شوية تخلويض في الموضوع خاصة إلي تفاصيل الخبر إلي تنقل على سي أن أن يذكر من جملة مصادرو على موضوع "عدم مصافحة الوزير" موقع "ترجي نت" في حين في الموقع هذاية فمة الخبر بدون حديث عن الأسباب أصلا (هنا)....الخبر "المحدث" متاع موقع يلا كورة ما يذكرش مصادر محددة لكن يتحدث في العام على "بعض التقارير"...

تحيين بناءا على تعليق وليد (أغزر اللوطة)... عن فوروم تونس-فوت تفاصيل أخرى هنا
شوف هنا وين يظهر إلي فمة صراع حول الموضوع من بداية تعيين طارق ذياب في ماي و تحديدا "ضغط من مسؤول عالي" على حمدي المدب... الفيديو إلي يحكي عليه وليد هنا و يظهرلي حسب التصويرة إلي طارق هو إلي طفى وزير الرياضة (الكعبي) بعد ما سلم على الوزير لول و الكعبي فاق بيه و قعد يقحرلو... كاينو بيناتهم مشاكل سابقة...
video

فمة زادة الحوار إلي عملو طارق ذياب مع جريدة "الشعب" (جريدة الاتحاد العام التونسي للشغل) و نشرو موقع الجريدة الالكتروني نهار لثنين هنا و حسب الحوار فإنو طارق نفى أنو قدم استقالتو ما يعني أنو حبها تكون إقالة... زيد قال إلي الوزير هو إلي طفاه و هو حس بالاهانة... و كاينو يلمح إلي طلبو منو الاعتذار و هو رفض "الانبطاح"

يقولون ان عدم مصافحتك لوزير الرياضة عبد الله الكعبي في نهائي الكأس هو السبب الرئيسي لاقالتك من مهامك ؟

حين صعدت الى المنصة الشرفية كان في الحسبان ان أصافح الجميع وقد صافحت حقيقة السيد محمد الغنوشي الوزير الاول وحين هممت بمصافحة وزير الرياضة وجدته غير مبال بالنظر لي فكان ان حصل أنني لم أصافحه أخلاقيا ما كان للعملية ان تحصل لكن الذي حصل بالنهاية حصل .

قد يقول قائل لماذا حصلت الحادثة أصلا ؟

هذا سؤال مهم وتاريخي لأن أبناء البلدي ما كان ليحصل بينهم ما حصل بيني وبين وزير الرياضة لأننا نستمد مبادئنا من كلام سيادة الرئيس زين العابدين بن علي الذي يؤكد على أهمية الحوار وعدم الظلم والمحافظة على المكاسب فأنا لعبت للترجي لمدة 20 سنة كما تقمصت زي المنتخب في أكثر من محفل دولي فهل يمكن اليوم ان يشكك بعضهم في وطنيتي وفي حبي لتونس ما حصل يومها موجع لكنني أعود لأقول أنني أفضل الكرامة على الانبطاح والمجاملة وسي عبد الله مس يومها من كرامتي لذلك لم أصافحه .

أما ملا نهائي كأس تونس المرة هذية... همجية و عرك وشباط... و عدها بش تولي أزمة وطنية...



عدد التعاليق: 7

    تعليق: Walid ben omrane ...  
    16 جويلية، 2008 3:08 ص

    Al Forum mta3 tunisie-foot.com 7ka ebarcha tafassil 3ala 7akaya hadhi; W Tarek 3mal déclaration ljarida imaratiya (tnajem talqa el lien fi el forum) sara7 fih eli louzir houwa ili tafah. W tnajem dailleurs tchouf elaqta 3al dailymotion. El ga7ra mta3 louzir tla5es kul chay.


    تعليق: Hamadi ...  
    16 جويلية، 2008 4:23 ص

    لا حول و لا قوة الا بالله اذا مستوى الوزير و المسؤولين وصل الى هذا الحد من التصابي (تفوريخ) فلا يمكن لنا، بعد اليوم، اللوم على الجمهور


    تعليق: 3amrouch ...  
    16 جويلية، 2008 4:51 ص

    حمادي
    الامر اعمق بياسر من مجرد مصافحة وتفوريخ متع مسوولين
    طارق موش او مرة "يطردوه" من الترجي
    بن يحي كيفكيف
    معلول كيفكيف
    نتذكر مرة معلول تعارك مع شيبوب خزرو معلول قالو وقتلي انا كنت نكور انت كنت في الفيراج تعيط معلول معلول
    فيبالي فمى رغبة لخنق كل صوت حر وصريح
    ناس تحبك ياتخدم كيفهم ياتسكت
    بلدان العالم الكل تعظم وتقدر الرياضين متاعها شوف ابسط مثال يانيك نواه عملولو ممر كامل باسمو في لورن قاروس,في بلجيكيا فمى محطة مترو باسم ايدي ماركس الي ربح دورة فرنسا للدرجات خلي عاد من المانيا وبيكنباور واحنا كان صحت الاشاعة قالك بوليس بوشلطة وقفو وحب يعملو محضر......مهزلة باتم معنى الكلمة


    تعليق: 3amrouch ...  
    16 جويلية، 2008 5:00 ص

    وليد
    ياحبذا لو تحطلنا رابط للفيديو السالفة الذكر على دايلي موشين
    مع الشكر


    تعليق: Walid ben omrane ...  
    16 جويلية، 2008 11:31 ص

    @ 3amrouch haw elien http://www.dailymotion.com/search/Coupe%2Bde%2Bla%2Btunisie/video/x61l43_coupetunisie2008est21esstatwij_sport


    تعليق: Tarek طارق ...  
    16 جويلية، 2008 11:35 ص

    شكرا وليد...

    حمادي... حاجات ممكن كانت تقتصر على الكواليس قاعدة تخرج البرة...

    إي عمروش.. صحيح معروف كان ديما فمة فيتو على طارق ذياب... هذاكة علاش الناس ركزت في النقاش في الفوروم على دور سليم شيبوب... لكن واضح إلي هو بعيد على موقع النفوذ توة

    رابط الفيديو حطيتو الفوق في التحيين... و زيد اللقطة بالتحديد موجودة الفوق


    تعليق: ancien combattant ...  
    16 جويلية، 2008 12:16 م

    Il paraît que Tarek Dhiab a donné une interview à Al Jazira où il accuse Abdallah Kâabi d'être le responsable de son éviction de l'EST. Quelqu'un peut-il nous donner un lien (s'il existe) qui renvoie vers cette ITV ? Merci.



طارق الكحلاوي
نشأ طارق في أحد مدن الضواحي مدينة رادس الواقعة في الجمهورية التونسية. يشغل الآن موقع أستاذ في جامعة روتغرز (قسمي التاريخ و تاريخ الفن). تلقى طارق تكوينه الجامعي في جامعة تونس (كلية 9 أفريل، إجازة و دراسات معمقة في التاريخ و الآثار) و جامعة بنسلفانيا (رسالة دكتوارة في تاريخ الفن). و يعلق بانتظام على القضايا و الاوضاع العربية باللغتين العربية و الانجليزية في مواقع و صحف مثل "الجزيرة.نت" و "القدس العربي" و "الحياة" و "العرب نيوز" و "ميدل إيست أونلاين"، و يكتب عمودا أسبوعيا في جريدة "العرب" القطرية. يكتب أيضا في قضايا ثقافية و نظرية تخص الاسلام المعاصر في المجلة البيروتية "الآداب". و تمت استضافته للتعليق في قناة "الجزيرة الفضائية" و قناة 13 "بي بي أس" (نيويورك).

Tarek Kahlaoui
Tarek grew up in the suburban city of Rades in Tunisia. He is currently an Assistant Professor at Rutgers University (a joint position in the Art History and History departments). Tarek graduated from the University of Tunis (Bach. and DEA in history and archeology) and University of Pennsylvania (Ph.D. in history of art). Tarek also comments regularly in Arabic and English on Middle Eastern issues and politics in Aljazeera.net, Al-Quds Al-Arabi, Al-Hayat, Arab News, and Middle East Online, and writes a weekly column for the Qatari newspaper Al-Arab. He also writes on intellectual and theoretical issues related to contemporary Islam in the Lebanese magazine Al-Adab. He was also invited to comment in Al-Jazeera Channel, and in Channel 13 (PBS-New York).