البارح كانت لي دردشة مع صاحب محل السلع الغذائية الهندية إلي مستانسين نتسوقو منو... لقيت قدامو صحيفة هندية بالانجليزية على صفحتها الرئيسية الخبر إلي خرج توة أسابيع لتالي متاع تصنيع شركة "تاتا" الهندية أرخص سيارة في العالم و إلي سعرها التسويقي الراهن داخل الهند 2500 دولار أكهو !!!! (مزيد من التفاصيل حول مشاريع "تاتا" هنا).... السيد، هو بالمناسبة شاب متعلم، كان فرحان برشة و عدو بش ينقز قدامي... تحس بالافتخار في الحركات متاعو... قعد يحكي بحماسة كيفاش السيارة هذية ولات تخوف في أكبر صانعي السيارات في العالم هذاكة علاش بش يحاولو بش يختلقو الاسباب بش ما تنافسهمش (هو الحاصل بالنسبة للاتحاد الأوروبي إلي اعتبر السيارة غير ملائمة لشروط السلامة)... لكنو قعد يأكدلي كيفاش السيارة بش تنجح برغة كل شي... السيد زادة كان مفتخر إلي صانع السيارة قرى في فيلادلفيا في جامعة بنسلفانيا في كلية وارتون و كيفاش أمو عطات 50 مليون دولار للجامعة...

على كل الموضوع هذاية ذكرني بموضوع آخر قاعد يكبر الحديث عليه و هو الدور المتزايد لما يسمى "الدول في طريق النمو" في تعديل التوازن الاقتصادي الدولي.... الموضوع هذا كتب عليه بشكل انطباعي توماس فريدمان الكتاب متاعو "العالم مسطح"... لكن فمة تحليلات أكثر جدية قاعدة تخرج: مثلا المقال إلي خرج توة أسابيع لتالي في مجلة الإيكونوميست (هنا) يوري كيفاش دول كيف الصين و البرازيل و الهند قاعدين يساهمو توة في اتجاه سد الفراغ الناتج على ضعف الدولار... و بالتالي تفادي أزمة في العالم و في أمريكا

عدد التعاليق: 5

    تعليق: Tunisie Blogs ...  
    20 جانفي 2008 4:59 ص

    The link to the article in the the economist is not valid


    تعليق: abunadem ...  
    20 جانفي 2008 7:17 ص

    فعلا موضوع جدير بالقراءة على الدول الفقيرة والنامية ان تنوع مصادرها حتى لا يبقى التعويل فقط على التداين كما الحال عندنا .بعض الدول النامية استطاعت ان تكون دول نموذج كالصين والهند والبرازيل.. وفي وقت ما كانت مصر فهل تفهم دولنا ضرورة التحول الى التصنيع والاعتماد على راسالمال الوطني؟؟؟
    الرابط الثاني لمجلة ايكونوميست يؤدي الى الرابط الاول اي موسوعة وايكيبيديا...راجعه.


    تعليق: Clandestino ...  
    20 جانفي 2008 2:04 م

    حاجة هايلة
    اما ما ظاهرلي كان تصلحلنا الكرهبة هاذي
    خاطرنا نموتو على الزحمة و هزان القربج الزايد في الكرهبة


    تعليق: Clandestino ...  
    20 جانفي 2008 2:07 م

    @ابو ناظم:
    التصنيع ماعادش شرط من شروط التنمية
    و المثال الاشتراكي متاع النمو المرتكز اساسا على التصنيع مشى على روحو من هاك العام


    تعليق: Tarek Kahlaoui ...  
    20 جانفي 2008 2:34 م

    تونس بلوغز و أبو ناظم شكرا على التصحيح... هاني صلحت الرابط

    أبو ناظم و كلاندو التصنيع مش على النمط الاشتراكي لهنا (يعني طبيعة الملكية بالأساس مختلفة) لهنا رأسمال محلي.. فمة طبعا تشجيعات خاصة من الدولة... أما زادة الاستثمار الأجنبي في الدول هذية و انفتاحها على السوق العالمية هو السر متاع النمو الكبير عندها... فمة توازن بين الزوز سياسات اقتصادية و طبعا عوامل تتجاوز السياسات عفوية في أغلبها (مستوى الأجر و القدرة الشرائية، السوق الاستهلاكية الضخمة...)

    كلاندو ربي يتولاك.... أما هي في الحقيقة تصلحنا لأنها عملية برشة بالنسبة للمدن إلي فيها كياسات صغيرة.. في باريس و خاصة في روما هذيكة نوعية السيارة المسيطرة على الكياس... المسألة مسألة عقليات... بالشوية بالشوية الناس توة تفهم أنو مش مهم الكرهبة الكبيرة إلي تستهلك برشة إيسانس...



طارق الكحلاوي
نشأ طارق في أحد مدن الضواحي مدينة رادس الواقعة في الجمهورية التونسية. يشغل الآن موقع أستاذ في جامعة روتغرز (قسمي التاريخ و تاريخ الفن). تلقى طارق تكوينه الجامعي في جامعة تونس (كلية 9 أفريل، إجازة و دراسات معمقة في التاريخ و الآثار) و جامعة بنسلفانيا (رسالة دكتوارة في تاريخ الفن). و يعلق بانتظام على القضايا و الاوضاع العربية باللغتين العربية و الانجليزية في مواقع و صحف مثل "الجزيرة.نت" و "القدس العربي" و "الحياة" و "العرب نيوز" و "ميدل إيست أونلاين"، و يكتب عمودا أسبوعيا في جريدة "العرب" القطرية. يكتب أيضا في قضايا ثقافية و نظرية تخص الاسلام المعاصر في المجلة البيروتية "الآداب". و تمت استضافته للتعليق في قناة "الجزيرة الفضائية" و قناة 13 "بي بي أس" (نيويورك).

Tarek Kahlaoui
Tarek grew up in the suburban city of Rades in Tunisia. He is currently an Assistant Professor at Rutgers University (a joint position in the Art History and History departments). Tarek graduated from the University of Tunis (Bach. and DEA in history and archeology) and University of Pennsylvania (Ph.D. in history of art). Tarek also comments regularly in Arabic and English on Middle Eastern issues and politics in Aljazeera.net, Al-Quds Al-Arabi, Al-Hayat, Arab News, and Middle East Online, and writes a weekly column for the Qatari newspaper Al-Arab. He also writes on intellectual and theoretical issues related to contemporary Islam in the Lebanese magazine Al-Adab. He was also invited to comment in Al-Jazeera Channel, and in Channel 13 (PBS-New York).