كنت تسائلت المرة الفايتة على مدى تأثير الفايسبوك على تنظيم المسيرات في تونس... يبدو أنو وقع منع المسيرات هذية (تقرير قدس برس هنا مثلا) لكن لفت الانتباه متاعي في تعليقات إلي موجودة على المجموعات إلي حاولت تنظيم المسيرات خاصة اعتقاد بعض المشاركين فيها القلائل إلي جاو إلي المسيرة "مرخص فيها" (هنا و هنا) مما يعكس عدم معرفة جزء كبير من الشبيبة التونسية مشكل تنظيم المسيرات في تونس و هل أنو الناس في حاجة لترخيص في حالات من النوع هذا.... على كل كيفما توقعت سابقا نعتقد إلي التظاهرات متاع اتحاد الشغل هي إلي بش تكون أكثر نجاح... فمة مسيرة نهار الخميس على الساعة العاشرة يظهرلي هي إلي بش تلقى أكثر تجاوب بغض النظر إذا كانت مرخصة و إلا لا لأنو هذية نقطة مش واضحة... من جهة أخرى صار تضارب بين بعض الاحزاب إلي نظمت المسيرات.. كل واحد بادر للتنظيم من دون تنسيق مع البقية... هي قدرة الاحزاب هذية على الحشد الجماهيري ضعيفة أصلا حتى إذا كان نسقت مع بعضها فما بالك إذا ما نسقتش... عموما حتاش لتوة يظهرلي فمة فشل في استعمال الفايسبوك في تنظيم مسيرات أو تظاهرات شعبية في حين أساليب الحشد التقليدية (في علاقة بالتظاهرات إلي صارت و بش تصير تحت إشراف اتحاد الشغل) مازالت هي الناجعة... و لهنا فمة أسئلة يلزم تتطرح على الأطراف إلي تحب تخدم بمعزل على اتحاد الشغل و تحب تنظم على روحها مظاهرات و تستعمل الفايسبوك... بما أنو المظاهرات المرخصة غير ممكنة تقريبا بناء على التجربة و بما أنو المظاهرات غير المرخصة بش تأدي للمواجهة و المنع... فإذا كان الهدف فعلا تنظيم مسيرة و إنجاحها مش تسجيل نقطة سياسية حول منع المسيرة... فإنو إنجاح المسيرة يفرض الحفاظ على سرية زمانها و مكانها... شنوة بش يكون دور فايسبوك في الحالة هذية؟ هل يمكن يكون عندو دور أصلا؟...

بالمناسبة في علاقة بمنع تنظيم المسيرات... في مصر في الأيام الفايتة وقع تنظيم مسيرات في الطرق العامة في عدد من المحافظات المصرية و الأمن ما تعرضلهمش بالرغم إلي هومة غير مرخصين... و ما طاحتش السما على الأرض... بالنسبة للناس إلي تنجم تدخل ليوتيوب شوفو الجزء الالول من برنامج العاشرة مساء على الرابط هذا
http://fr.youtube.com/watch?v=rO6C2L8kBks


عدد التعاليق: 4

    تعليق: 3amrouch ...  
    30 ديسمبر 2008 11:45 ص

    طارق
    جاني خبر من سوسة موثوق منو
    قالك فرقو المسيرة الي جاوها سفيل اكثر من لعباد وطلبو منهم المغادرة
    حتى لهنا الامر عادي لكن رئيس الشرطة توجه لمجموعة قاللهم انتوما متع فايس بوك؟؟؟ فيبالكم معندكمش رخصة لمثل هذه الامور؟ تحبو نشدوكم توة؟ اي افرق عليا الحضبة وذلك ماكان خبر صحيح


    تعليق: taha ...  
    30 ديسمبر 2008 2:53 م

    المسيرات الي ينظمها اتحاد الشغل ديمة عندها ترخيص من السلطة يا طارق. تخرج من بورصة الشغل، كان صدقني ربّي، بجانب TGM وتتعدى لشارع محمد الخامس وغير مسموح لها ان تدخل اي شارع اخر...مسيرة الطريق الواحد "شارع محمد الخامس" وبترخيص وفي يوم عطلة...هي لذر الرماد في العيون لا أكثر ولا أقل...ليس بهذا الشكل ندعم الشعب الفلسطيني الذي يتعرض لمجزرة حقيقية.
    على اتحاد الشغل ان يتحرك في كل الجهات عبر تنظيم مسيرات وفعاليات ثقافية مختلفة: أمسيات شعرية وموسيقية مساندة للشعب الفلسطيني.
    اتحاد الشغل يملك كل الوسائل لتكون مساندته اكثر جدوى وفاعلية.


    تعليق: Bedreddine ...  
    30 ديسمبر 2008 7:22 م

    @ Taha
    أمسيات شعرية وموسيقية مساندة للشعب
    الفلسطيني.....

    mdr...


    تعليق: taha ...  
    31 ديسمبر 2008 11:19 ص

    يا بدرالدين اظن انك لم تفهم كلامي او ربّما تريدني ان اقترح ارسال الجيش او المتطوعين الى غزّة الحبيبة.انا قلت على اتحاد الشغل ان يوظف امكانياته لمساندة فعلية عبر تنظيم مسيرات في كل الجهات، وكذلك تنظيم فعاليات ثقافية يا صديقي تكون في شكل امسيات شعرية، وفن ملتزم بقضايا الجماهير كشكل من اشكال المساندة وذلك لمزيد التحسيس وحشد الراي العام ومزيد تعبئته...هذا ما قصدته وهذا ما علمتنا اياه الحركة الطلابية في ايام عزّها.
    تتعدد اشكال المساندة : من المسيرة الى كل أشكال التعبير...
    ويمكن ان تنجح اشكال التعابير الثقافية في حشد الجماهير للتبرع بالدم مثلا او التبرع بالمال او تحضيرها لتحركات مستقبلية اكثر تطور.
    ابتعد عن العاطفة وكن واقعيا يا بدرالدين وان كنت تريد رفع سقف مطالبك فلتذهب الى غزّة حالا.
    وماهي مشكلتك مع الشعر والفن الملتزم الراقي الذي يمكن ان يحرك الجماهير اكثر من مسيرة مرخصة تمر من شارع محمد الخامس فقط في يوم عطلة.
    الله يرحمك يا محمود درويش.
    mdr...



طارق الكحلاوي
نشأ طارق في أحد مدن الضواحي مدينة رادس الواقعة في الجمهورية التونسية. يشغل الآن موقع أستاذ في جامعة روتغرز (قسمي التاريخ و تاريخ الفن). تلقى طارق تكوينه الجامعي في جامعة تونس (كلية 9 أفريل، إجازة و دراسات معمقة في التاريخ و الآثار) و جامعة بنسلفانيا (رسالة دكتوارة في تاريخ الفن). و يعلق بانتظام على القضايا و الاوضاع العربية باللغتين العربية و الانجليزية في مواقع و صحف مثل "الجزيرة.نت" و "القدس العربي" و "الحياة" و "العرب نيوز" و "ميدل إيست أونلاين"، و يكتب عمودا أسبوعيا في جريدة "العرب" القطرية. يكتب أيضا في قضايا ثقافية و نظرية تخص الاسلام المعاصر في المجلة البيروتية "الآداب". و تمت استضافته للتعليق في قناة "الجزيرة الفضائية" و قناة 13 "بي بي أس" (نيويورك).

Tarek Kahlaoui
Tarek grew up in the suburban city of Rades in Tunisia. He is currently an Assistant Professor at Rutgers University (a joint position in the Art History and History departments). Tarek graduated from the University of Tunis (Bach. and DEA in history and archeology) and University of Pennsylvania (Ph.D. in history of art). Tarek also comments regularly in Arabic and English on Middle Eastern issues and politics in Aljazeera.net, Al-Quds Al-Arabi, Al-Hayat, Arab News, and Middle East Online, and writes a weekly column for the Qatari newspaper Al-Arab. He also writes on intellectual and theoretical issues related to contemporary Islam in the Lebanese magazine Al-Adab. He was also invited to comment in Al-Jazeera Channel, and in Channel 13 (PBS-New York).