العودة للتدوين بعد انتهاء "العطلة" في تونس يذكرني بأجواء العودة المدرسية (و أنا ما نخبيش عليكم كنت نكره العودة المدرسية و مازلت... لأنها في المخيلة متاعي كانت ديما تتزامن مع: الدنيا إلي تبدى تبرد و الحريقة إلي تطلع في شط رادس و يبدى الموسم الكروي بالجولات الماصتة لولانية و نبداو نشدو الصف في المكتبات على الكرارس و الغلافات)... و هذاية ما يرجعش لأن العودة للتدوين تزامنت مع العودة المدرسية أكهوا و لكن زادة بسبب أن التدوين ولا كاينو واجب يلزم الواحد يقوم بيه كيما المشيان للمكتب.... "العطلة" في تونس كانت معبية كالعادة بالذكريات المتنوعة (يعني إلي تشد في المخ و مش بالضرورة الباهية).... و حاولت نغطي بعضها فقط في التعليقات الصيفية هذية و زادة هذية... و ربما نرجع لبعضها في فترة لاحقة... لكن تحدثت زادة (لهنا و لهنا) على إلي شفتو خلال العطلة في موقع بودورو (لنقد الصحافة المتوسطة، و ندعو بالمناسبة المدونين للمشاركة بشكل أكبر في الموقع هذاية) لأنو توفرتلي فرصة بش نشاهد بشكل مكثف خاصة إعلامنا التلفزي و هي فرصة ما تتوفرليش الحقيقة في أمريكا لأنو لا الوقت و لا شبكات القنوات المتوفرة تسمح بمشاهدتهم بسهولة (بالمناسبة ربما توة نجم نتبعهم أكثر من قبل خاصة إلي سرعة بث (الستريم) متاع قناة "تونس 7" على الانترنت تحسنت في الأشهر لخرة بعدما كان الواحد يتفرج فيها بصيغة اللقطات البطيئة و هذاية يرجع لطبيعة البث من موقع الاذاعة و التلفزة)... لكن رجوعي لهنا ما يعنيش إلي أخبار تونس ما تبعنيش حتاش لهنا... و المرة هاذي في علاقة بالذات بموضوع العودة المدرسية إلي ما نستفايلش بيها برشة... البارح جاتني رسالة من زميلي سابقا في كلية 9 أفريل (يعني أيامات الشغب و السياسة)... صديقي محمد مومني إلي خاض معركة مع جملة من الطلبة المتخرجين بداية السنة الماضية من أجل تشغيلو (بعدما نجحو في الكاباس كتابيا لكن وقع إسقاطهم في الكاباس شفاهي لأسباب سياسية كيما هوما مقتنعين)... و إلي تمكن في النهاية من العمل في اختصاصو كأستاذ فلسلفة السنة الدراسية الفارطة (أستاذ تعليم ثانوي "صنف أ").... محمد إلي تحصل، حسب رسالة بعثها بالإضافة لأصدقاؤو لمواقع إخبارية مختلفة، على معدلات مرتفعة من المتفقدين إلي زاروه في حصص تدريس الفلسفة لتلاميذ الباكالوريا بأحد معاهد حي التضامن... محمد جاتو برقية البارح من المندوب الجهوي للتعليم في أريانة يعلموا فيها بعدم تجديد عقدو كأستاذ "صنف أ"... و بالتالي التخلي عن خدماتو.... في الحقيقة محمد بدى السنة هذية يدخل في أجواء عادية، يعني أجواء متاع أي واحد من المفروض يكون في عمرو: بالرغم من عدم تخليه على قناعاتو السياسية، فإنو يشتغل في اختصاصو، ضامن حقوق بشرية أساسية كيف الأكل و المسكن، و بدى يفكر بحياتو الخاصة (بالمناسبة محمد هزني خطبتلو الصيف هذاية بعد سنوات من الانتظار)... هذا بعد سنوات من العمل السياسي و ما يعنيه من ملاحقة و عدم استقرار... لكن البرقية هذية في النهاية بش تخليه يتمسك، و ممكن بشكل راديكالي أكثر من قبل، بالعمل السياسي المعارض.... هذاية مثال على نوع خاص من العاطلين عن العمل و هوما العاطلين بالتحديد لـ"أسباب سياسية".... و هذومة ينضافو طبعا على مئات الآلاف من العاطلين عن العمل لأسباب اقتصادية و سياسية عامة.... و إلي هوما مازالو ما خمموش أصلا بش يعبروا سياسيا على مشكلتهم، على الأقل حتاش للحظة هذية.... على كل حال ما كنتش نحب تدوينة العودة المدرسية تكون بالصيغة هذية: يعني "عودة مدرسية" بدون عودة مدرسية.... لكن ما كانش ممكن ما نكتبش على خبر كيفما هكة... و كل عودة و الجميع بخير... و طبعا... رمضانكم مبروك أجمعين بالنسبة للصائمين باختيارهم و الصائمين قسرا...



عدد التعاليق: 9

    تعليق: samsoum ...  
    12 سبتمبر 2007 في 5:05 م

    اللَه غالب يا طارق . واللّه موش فاهم أنا هالمسؤولين كيفاش يخمموا و قداش متوسطين كيما تقول أنت.
    زعما المدير الجهوي هذا خذا القرار هذا وحدو ولاّ بتعليمات من الأمن أو من الحزب؟ وهو في كلّ الحالا ما يخدمش مصالحهم,بل العكس. حاسيلو رمضانك مبروك


    تعليق: غير معرف ...  
    12 سبتمبر 2007 في 6:57 م

    Mar7bé, Bon retour... Welcome Back!
    Au sujet de ton ami, dommage que la liberté d'expression est bien chère. Et que ceux ki y sont attachés assument... Je suis réellement navrée, ama tal9a we7ed yesta3mel lsenou autrement 7achtou biha leblassa. 3ad ela9rabouna awla bel ma3rouf.

    Romdhankom Mabrook


    تعليق: Clandestino ...  
    12 سبتمبر 2007 في 7:58 م

    انشالله رمضانك مبرووك
    :)


    تعليق: Tarek طارق ...  
    13 سبتمبر 2007 في 12:32 ص

    سمسوم و جوي و كلاندو... رمضانكم مبروك أيضا... و ربي يهدي


    تعليق: abunadem marzouki ...  
    13 سبتمبر 2007 في 5:42 ص

    موش وحدو يا طارق حتى زميلو علي الجلولي من قبلي ورفيقو في النضال مع المسقطون عمدا في الكاباس يظهرلي تخالاو عليهم الكل السنه هاذي بقرار سياسي كيما يقولي علي رغم اللي هذا الاخير زادة تابعت بنفسي تقرير الارشاد متاعو ممتاز.اما واضح الجماعة اللي قرفوا عملاول و قاطعوا المدرسة الصيفية تخلاو عليهم من دون ذكر الاسباب


    تعليق: abunadem marzouki ...  
    13 سبتمبر 2007 في 5:43 ص

    نسيت نقوللكم رمضانكم مبروك


    تعليق: Téméraire ...  
    13 سبتمبر 2007 في 6:27 ص

    Re-bienvenue, Romdhanek Mabrouk w Siyemek Makboul et vaut mieux que je la ferme. No comment.


    تعليق: Walid ben omrane ...  
    13 سبتمبر 2007 في 12:21 م

    Bonjour Tarek, Bon retour, et Romdanek Mabrouk. Merci d'avoir penser à M.Moumni Je pense que le bras de fer qu'il oppose au ministère de l'education et de la formation ne doit pas être hypermédiatiser surtout en ce moment où koul foul lahi fi nawarou. Chahya tayba.


    تعليق: Tarek طارق ...  
    13 سبتمبر 2007 في 5:41 م

    إي يا أخ أبوناظم عندي فكرة على الوضعية بشكل عام... يا وليد الواحد يقوم بالمطلوب البقية تتكفل بيه الظروف... بالمناسبة يمكن الاتصال بمحمد مومني على العنوان متاعو في سكاي بي
    moumni mohamed

    رمضانكم مبروك أبو ناظم، تيميرير، و وليد



طارق الكحلاوي
نشأ طارق في أحد مدن الضواحي مدينة رادس الواقعة في الجمهورية التونسية. يشغل الآن موقع أستاذ في جامعة روتغرز (قسمي التاريخ و تاريخ الفن). تلقى طارق تكوينه الجامعي في جامعة تونس (كلية 9 أفريل، إجازة و دراسات معمقة في التاريخ و الآثار) و جامعة بنسلفانيا (رسالة دكتوارة في تاريخ الفن). و يعلق بانتظام على القضايا و الاوضاع العربية باللغتين العربية و الانجليزية في مواقع و صحف مثل "الجزيرة.نت" و "القدس العربي" و "الحياة" و "العرب نيوز" و "ميدل إيست أونلاين"، و يكتب عمودا أسبوعيا في جريدة "العرب" القطرية. يكتب أيضا في قضايا ثقافية و نظرية تخص الاسلام المعاصر في المجلة البيروتية "الآداب". و تمت استضافته للتعليق في قناة "الجزيرة الفضائية" و قناة 13 "بي بي أس" (نيويورك).

Tarek Kahlaoui
Tarek grew up in the suburban city of Rades in Tunisia. He is currently an Assistant Professor at Rutgers University (a joint position in the Art History and History departments). Tarek graduated from the University of Tunis (Bach. and DEA in history and archeology) and University of Pennsylvania (Ph.D. in history of art). Tarek also comments regularly in Arabic and English on Middle Eastern issues and politics in Aljazeera.net, Al-Quds Al-Arabi, Al-Hayat, Arab News, and Middle East Online, and writes a weekly column for the Qatari newspaper Al-Arab. He also writes on intellectual and theoretical issues related to contemporary Islam in the Lebanese magazine Al-Adab. He was also invited to comment in Al-Jazeera Channel, and in Channel 13 (PBS-New York).