هذاية موضوع يستحق وقفة أطول و حبيت نكتب فيه توة من مدة طويلة... لكن توة بش نحط رؤوس أقلام... المشهد المدوناتي التونسي انجمو نتعرفو عليه مثلا من خلال مجمعات التدوين كيف تن-بلوقس، و توني-بلوقس، و تحت السور مثلا... الواضح إلي المدونات الغالبة على المجمعات هذية تتميز بالتالي: أولا، أنها ترغب في التواصل مع بعضها.. و هذاية يتجسم مثلا في أنها تعلق عل تدوينات بعضها و تصوت على بعضها و تشارك في مبادرات جماعية مختلفة (رديون، ضد الحجب، قفصة، أيام حرية التعبير و المغرب الكبير...) و حتى تنظم لقاءات واقعية ("ميت-آب") و كذلك تدخل في صراعات فكرية و سياسية مع بعضها... يعني تجسد واقعيا معنى "البلوقوسفير"... هذا وصل إلى مستوى آخر من خلال "حومة البلوقسفير" إلي تعكس خياليا الطابع متاع التعارف الجماعي إلي يميز المدونات التونسية إلي موجودة على المجمعات هذية... ثانيا، الحاجة لخرى إلي تتميز بيها المدونات إلي موجودة على مجمعات التدوين المذكورة هي هيمنة اللغة الفرنسوية.. صحيح كيف ما لاحظو برشة مدونين إلي العربية الفصحى أو الدارجة استعمالها ماشي و يزيد في الزوز سنوات لخرة لكن ما يمنعش إلي اللغة الرئيسية إلي مازالت طاغية على المدونات إلي تظهر في تن-بلوقس و توني-بلوقس هي مدونات مكتوبة بالفرانسوية... و هذا ما يعكسش تقهقر الفرانوسية في مجتمعنا و في الواقع التونسي سواء من حيث الكم أو النوع... ثالثا، فمة نزعة ربما بارزة متاع توجهات فكرية تعطي لنفسها عناوين سياسية و فكرية من نوع "علمانية" و أحيانا "يسارية" و أحيانا "إنفتاحية".. إلخ لكن بتوجه يحاول بشكل عام يبتعد عن الالتزام السياسي...

لكن السؤال إلي كنت ديما نرى أنو من الضروري طرحو إزاء مشهد من النوع هذا هو إلي أي مدى يعكس فعلا واقع مجتمعنا...

الحقيقة مش كل المدونات التونسية موجودة على مجمعات التدوين إلي ذكرتهم الفوق... فمة فضاء كامل تحسو خارج "الجو" متاع تن-بلوقس و توني-بلوقس... هو فضاء المدونات التونسية المسجلة على موقع "مكتوب" (بالمناسبة فمة أكثر من 600 مدونة تونسية على "مكتوب" و لهنا نتحدث على المدونات المحينة مش المسجلة فقط... ابحث على مدونات مسجلة باسم تونس هنا... للاشارة فمة مدونات متعلقة بتونس من غير ما تكون مسجلة باسمها)... طبعا فمة بعض مدونات "مكتوب" مسجلة على تن-بلوقس و توني-بلوقس لكن عددها ما يعكسش الحجم الحقيقي الكبير متاعها... و لهنا الصورة تختلف تماما... أولا، فمة عدد قليل برشة من المدونات هذية إلي فيها جو متاع تشارك و تبادل التعاليق و مبادرات جماعية... و إلا صراع/جدال مشترك فكري أو سياسي... يعني صعيب بش نقولو إلي فمة "بلوقوسفير" تونسي بالمعنى إلي نلقاوه في تن-بولس... ثانيا، اللغة المسيطرة هي العربية فصحى بالأساس و دارجة أحيانا أخرى... أخيرا فمة ميل أكثر للسياسة في المدونات هذية و نقصد هنا خاصة السياسة بمعناها المتنظم و المتحزب و فمة بروز أقوى للتيارات إلي تعطي أو نعطويها عناوين "إسلامية" و "قومية" بشكل عام...

أنا الحقيقة ما نعتبرش إلي أي من الزوز فضاءات هذية تونسي أكثر من لاخر... لكن نعتقد إلي القطيعة نوعا ما الموجودة بين الزوز فضاءات هذية تعبر على مشكل واقعي عندو أبعاد فكرية و سياسية... طبعا مع التأكيد إلي فمة من خصائص كل فضاء شوية في الفضاء لاخر (يعني مثلا في مستويات استعمالات اللغة و نوع الاتجاهات الفكرية و السياسية) و بالتالي ما فماش قطيعة كاملة بيناتهم...

على كل هذية مجرد رؤوس أقلام... ربما نرجع للموضوع نهار آخر...


عدد التعاليق: 10

    تعليق: البرباش ...  
    20 سبتمبر، 2008 7:54 م

    طارق...
    ثمة مجمع مدوناتي ىخر ما تطرقتش لذكرو في التدوتينة متاعك...
    http://www.berberus.com
    مجمع يجمع برشا مدونات من كامل أنحاء المغرب العربي (مع امكانية الإختصار للمدونات التونسية فقط مثلا او أي بلاد م البلدان المغاربية) و تحس فيه برشا خدمة (لدرجة انو تخليك تحسو معقد فوق اللازم) لكن هذا ما يمنعش انو فيه خصايص و مميزات ما نلقاوهمش في المجمعات الاخرين الثلاثة اللي حكيت عليهم...
    و ثمة زادة مجمع آخر عملو نهاد (كان طالب في كلية العلوم بتونس هندسة اعلامية، تو نورمالومون مهندس)
    http://tn-pla.net
    يجمع العديد م المدونات التونسية.


    تعليق: Tarek طارق ...  
    20 سبتمبر، 2008 8:08 م

    برباش.. نعرفهم الزوز.. ما تطرقتلهمش لأنو الاول (بربيروس.. إلي خونا سامي عامل فيه مجهود) يتعلق بالمنطقة المغاربية بشكل عام و أنا حبيت نركز على المجمعات الخاصة بالتوانسة...فمة مجمع عاملينو نفس المدونين على موقع "نواة" أما خاص بالمدونات التونسية... و بشكل عام ف،و بربيروس أو المجمع على نواة ياخذو نفس المدونات إلي موجودين على تن-بلوقس... و فمة حضور محدود متاع مدونات مكتوب...

    موقع بلانات يظهرلي ما يختلفش برشة على تن-بلوقس و توني-بلوقس... يعني أنا تحدثت على الأأقدم و الأشهر فقط... و في الحالات الكل المجمعات هذية الكل التونسية ما فيهاش برشة مدونات تونسية من مكتوب... يعني نفس المشكل...


    تعليق: Houssein ...  
    20 سبتمبر، 2008 11:47 م

    Faut croire que je suis très dépassé :) Je ne savais pas que Maktoob contenait autant de blogs tunisiens ! Je vais y faire un tour pour dénicher quelques blogs à ajouter à tn-blogs !

    Merci ;)-


    تعليق: Houssein ...  
    20 سبتمبر، 2008 11:57 م

    Au fait Tarek, est-ce que tu peux me dire comment tu as trouvé les 600 blogs tunisiens sur Maktoob ?


    تعليق: Tarek طارق ...  
    21 سبتمبر، 2008 12:13 ص

    إي حسين فكرة باهية... في اطار "تجسير الهوة" كيف يقولو في الاخبار.. أما بالحق حاجة باهية كان تشرك أكثر مدونات من مكتوب في تن-بلوقس...

    أولا ادخل على الرابط هذا
    http://www.maktoobblog.com

    مبعد فمة على اليسار مستطيل صغير فيه "مدونات حسب الدولة"... اختار "تونس" أتوة يعطيك المدونات المسجلة باسم تونس...


    تعليق: Saied ...  
    21 سبتمبر، 2008 12:53 ص

    الملاحضات متاعك في محلها. حاجتين : ١- في ماي عملت إحصاء للمدونات "التونسية" ؛ لقيت تسعة في "مكتوب". العدد هذا كبر، و قاعد يكبر بسرعة، و هذا يعكس إهتمام متزايد بالمدونات، و التدوين باللغة العربية. ٢- مجمعات التدوين : الواجهة متاعهم ؛ و اللغة المستعملة ؛ فرنساوية. الحاجة هاذي يلزم تتبدل.


    تعليق: Tarek طارق ...  
    21 سبتمبر، 2008 2:25 ص

    سعيد.. نتفق معاك في التقييم هذا.. و بالمناسبة يعطيك الصحة على المجهود إلي تعمل فيه في تحت السور...


    تعليق: خليّل ...  
    21 سبتمبر، 2008 1:55 م

    hussein voila un blog qui mérite être sur tn-blog

    http://samvagues.blogspot.com/ il est inscript sur le top de tn-blog mais il n'est pas agrée dans tn-blog il faut voir ce point aussi

    Bien cordialement


    تعليق: Sami Ben Gharbia ...  
    23 سبتمبر، 2008 10:03 ص

    خويا طارق، المعلومات المقدمة هوني حول مجمع بربارس غير دقيقة. و أنا شخصيا ما عندي حتى مجهود فيه.


    تعليق: SAMIR ** سمير ...  
    10 ديسمبر، 2008 3:23 م

    أتساءل لماذا لا تبرز مدونتي samvagues.blogspot.com بـ tn.blog.أرجو توضيح السبب و شكرا



طارق الكحلاوي
نشأ طارق في أحد مدن الضواحي مدينة رادس الواقعة في الجمهورية التونسية. يشغل الآن موقع أستاذ في جامعة روتغرز (قسمي التاريخ و تاريخ الفن). تلقى طارق تكوينه الجامعي في جامعة تونس (كلية 9 أفريل، إجازة و دراسات معمقة في التاريخ و الآثار) و جامعة بنسلفانيا (رسالة دكتوارة في تاريخ الفن). و يعلق بانتظام على القضايا و الاوضاع العربية باللغتين العربية و الانجليزية في مواقع و صحف مثل "الجزيرة.نت" و "القدس العربي" و "الحياة" و "العرب نيوز" و "ميدل إيست أونلاين"، و يكتب عمودا أسبوعيا في جريدة "العرب" القطرية. يكتب أيضا في قضايا ثقافية و نظرية تخص الاسلام المعاصر في المجلة البيروتية "الآداب". و تمت استضافته للتعليق في قناة "الجزيرة الفضائية" و قناة 13 "بي بي أس" (نيويورك).

Tarek Kahlaoui
Tarek grew up in the suburban city of Rades in Tunisia. He is currently an Assistant Professor at Rutgers University (a joint position in the Art History and History departments). Tarek graduated from the University of Tunis (Bach. and DEA in history and archeology) and University of Pennsylvania (Ph.D. in history of art). Tarek also comments regularly in Arabic and English on Middle Eastern issues and politics in Aljazeera.net, Al-Quds Al-Arabi, Al-Hayat, Arab News, and Middle East Online, and writes a weekly column for the Qatari newspaper Al-Arab. He also writes on intellectual and theoretical issues related to contemporary Islam in the Lebanese magazine Al-Adab. He was also invited to comment in Al-Jazeera Channel, and in Channel 13 (PBS-New York).