لفت إنتباهي ليوم إلي الصباح عملت تغطية طويلة (جزء منها في الصفحة لولى) على انتخاب الأستاذ البشير الصيد (الوجه القانوني و السياسي المعروف) عميد للمحامين (المرة الثانية في تاريخو)... فما حسب موقع الصباح في الانترنت على الأقل ستة أركان في عدد اليوم حول الموضوع هذاية: تقرير صحفي و تحليلي لصالح عطية، تقرير آخر حول إلي جرى في الجلسة العامة، تصريح لبشير الصيد، أرقام من الانتخابات، تقرير على انتحابات الهيئة الوطنية للمحامين (و هي تقريبا أهميتها كيف أهمية العمادة بفعل تأثيرها على مستوى اتخاذ القرارات)، و أخيرا ملاحظة (مانجمش نصنفها من الناحية الصحفية: رأي، تقرير إخباري...؟) بعنوان "رد فعل إنفعالي"... هذية من جهة حاجة باهية خاصة أن الأستاذ الصيد ربما ما نالش التغطية الإعلامية إلي يستاهلها "عميد للمحامين" وقتلي شد عميد إلي مرة إلي فاتت... من جهة أخرى التقارير متاع الصباح يظهر منهم خط تحرير يرى أنو انتخاب الصيد هو انتخاب لشخصية ماهياش تدافع على مسائل مهنية و أنو مسيس... المشكل إلي أنا حسب ما نعرف إلي ما فما حتى مرشح للعمادة ماهوش مسيس بما في ذلك المرشح المنافس للصيد يعني الأستاذ الظريف... على كل حال نحب نقول مبروك لسي البشير إلي هو، كيما عرفتو شخصيا منذ مدة طويلة و هو تقريبا في مقام والدي، شخص متواضع برشة و تكوينو و تجرتو في ميدان القانون كبيرة (كان قاضي في التعقيب قبل ما يقرر يولي محامي)... و يبقى أهم رابح في الانتخابات هذية حسب رايي هي الأجواء الانتخابية الحرة إلي يتمتعو بيها المحامين... و لو أنو رايي يقعد أنو فما إمكانية أنو يتوجد توازن بين التوجه المشروع متاع غالبية المنتسبين لأي قطاع مهني أن تكون عندهم مواقف سياسية عامة (هذية حاجة موجودة في نقابات العالم إل كل) و بين المهمة الأساسية لأي نقابة و إلي هي محاولة إيجاد حلول للقطاع متاعهم و هذية حاجة ما تنجم تجرى كان في إطار الحوار مع السلطات القائمة و مش بالقطيعة معاها.... لكن طبعا "أهل مكة أدرى بشعابها"... و "أهل مكة" انتخبو الآن ممثليهم
بعض التصنيفات الصحفية
"...الصيد في خانة المحامين المتسيسين و هو مدعوم من تيارات اليمين و اليسار ..."
أمّا سي الظريف فهو"... مدعوم من التيّار المهني ..."
هكّة تكستو حسب ما ورد في صحيفة البيان متاع ليوم
في موضوع آخر: بالله قولي يا سي ساب كوماندانتي ماركوس آخي البيان ولات تصدر نهار التلاثاء
:)))))))))
ثلاثاء احنا اليوم ؟؟
الله غالب الايام الكل ولات كيف كيف و الجرايد متاعنا متشابهين بدرجة كبيرة . انا نلقى باكو متاع جرايد مطيّش ( عندي الوالد -ربي يخليه- كل يوم ياخذ الشروق و الصريح و جريدة و الا زوز من متاع لندرة و الاسبوعية متاع النهار هذاكة)
نتذكر اني قريتو المقال و نسيت في اناهي جريدة ...
انشاالله نثبت و نقلّك
انا بقيت متذكر الارتيكل علا خاطر شد انتباهي التحليل الصحفي للتيارات في المؤتمر متاع المحامين , كيفاش فمّا تيار سياسي و فمّا تيار مهني ,
انا ما فيباليش اللي عمادة او هيأة المحامين تحمل صفة حزب سياسي
شنوة.... ما عادش تفرق بين الأيامات في غابات الشياباس.... عهدي بيها البيان تصدر نهار لثنين... بعناوين متاع السجع الكروي
:)))
يظهرلي فيك متعاطف مع قضية الشياباس
اذا تحب تنظم لجيش زاباتا للتحرير , تنجم تقدم مطلب , انا خذيت البروفي متاع مطالب الانضمام في تونس
و باش نزيد نحل شباك اخر ( زيادة على شباك الحرقة) و هكة نطوروا خدماتنا و نقربوها للمواطن اينما كان
حكاية فارغة كي السياسي كي المهني إلى يوم الناس موش باش تولي عنا تغطية صحية ولا انتماء لصندوق تقاعد، وظروفنا هي هي، لا فلوس لا احترام، كان الوقوف بالسوايع، شياح الريق، وكثرة المشي والجي عالكورسات وأرجع غدوة خدامة، وقتاش نوللي أسيستانت بأوراقي ونرتاح
إرسال تعليق