نحبهم كليمتين خفاف نظاف

في شهر أوت إلي فات كتبت تدوينة (هنا) إدانة للمدون تيتوف لما ظهرلي و ما ظهر للكثير من المدونين (كيفما واضح من التعليقات) قرصنة منو لمدونة اسمها "بخار أنفاسي"... صاحب المدونة هذية ظهر يكذب كيفما اعترف في تدوينة أخيرة (و ظهر أنو يصفي في حسابات شخصية مع مدونين أخرين في البلوقسوفير يعني لعب ذري ماعنديش حتى الوقت بش نعرف تفاصيلو)... و مع معطيات أخرى تلقيتها من بعض الاصدقاء ولى واضح أنو تيتوف بريئ من الاتهام هذا... و بالتالي نعتبر نفسي غلطت و نحب نعتذر من تيتوف من الموقف هذاكة...

بدون أي تبريرات يلزم نعاود نقول (كيفما سبقلي أني قلت في التدوينة المذكورة الفوق) أنو موقفي هذاكة ماكانش مبني على مجرد اتهام في علاقة بالمدونة هذيكة... كنت من أول المدافعين عن حق ناس كيف تيتوف تتوجد في البلوقوسفير بل تعاطفت أكثر من مرة مع مواقف خذاها و دعيتو لمدونة "رديون" بش يدافع على رؤيتو بدون تشويه... كيفما قلت قبل و نعاود شبيبة كيف تيتوف تعبير على الكثيرين من جيل جديد من الشباب التونسي و أنو توفير منابر للتعبير ليهم أكثر منفعة لمجتمعنا لأي محاولة لإسكاتهم كيفما يحصل بشكل روتيني... و بالتالي أنا آخر شخص يتبلى بسبب أو بدون سبب على ناس كيف تيتوف... المشكل أنو شفت مؤشرات مباشرة و غير مباشرة على استخفاف بموضوع القرصنة و استعداد (حتى تحت عنوان التفدليك كيفما تبين سبب "تدوينة الاعتراف" متاعو) للقرصنة... هذاكة كان عندو دور كبير في الموقف إلي خذيتو... بالمناسبة نحب نقول لتيتوف إلي حل مدونة جديدة (هنا) و طلب إعادة اعتبار ليه أنو يواصل التدوين و ما يبطلش (حتى "لأسباب مهنية" كيفما سمعت) و أنو في نفس الوقت ما يستخفش من موضوع القرصنة.. و بالمناسبة توجهتلو دعوة للالتحاق بمدونة ضد الحجب مجدد إن أراد

موضوع القرصنة يهزني لموضوع آخر مش بعيد عليه إلي هو "قرصنة القرصنة" أي قرصنة ملف القرصنة و تحويلو لسلاح لترهيب الناس و توظيفو في صراعات سياسية أو فكرية من خلال التمسكين و التموقع في موقع الضحية الوهمية... هذا ظهر أكثر من مرة في الأشهر الاخيرة... آخرها بمناسبة اختفاء مدونة صديقنا "تونسي في بلد البنوك" إلي دوب ما قال على إختفاء مدونتو (بعد الضغط على رابط في الايمايل متاعو من هاتفو الخاص) تفاعلو معاه عديد الناس إلي عرفت على فايسبوك أو بشكل شخصي... و بالرغم من تشكك "تونس من بلد البنوك" المعني بالقرصنة من سبب حدوثها (و هو الشي إلي قالهولي بشكل مباشر) إلا أنو فمة كيف العادة محاولة من قبل البعض لقرصنة القرصنة من خلال الايهام بأنها "واضحة" المصدر و أنها مسيسية أو أنها تمت على أساس فكري... العدو في الحالة هذية مش "عمار" إلي يقع تبرئتو بشكل مجاني (بالرغم إلي تدوينات "تونسي في بلاد البنوك" الأخيرة نقد للانتاج التلفزي القزوردي المظلف) و يصبح العدو بشكل آلي "الاسلامي المتطرف"... طبعا نموذج "الإسلامي المتطرف" إلي يقرصن افتراضيا و واقعيا موجود... لكن الاستعداد الآلي لتحويل موضوع القرصنة في البلوقوسفير التونسي إلي موضوع "الاسلاميين المتطرفين" ضد "العلمانيين" (الناس مليحين) هو اتهام بدون أي دلائل مادية.. و لكن طبعا العجز عن تقديم الدلائل مع تقديم استنتاجات بكل ثقة في النفس حاجة مش غريبة بالنسبة للبعض..

بالمناسبة نحب نعمل إشارة لهنا للكلام إلي قالهولي خونا البرباش إلي نثق في معلوماتو في مجال الاعلامية أنو عملية القرصنة إلي تستهدف إيمايل "غيمايل" و إلي تنتهي بحذف الحساب الالكتروني في "غيمايل" و بالتالي حساب "البلوغر" حاجة منتشرة بكثرة في جميع أنحاء العالم خاصة بالنسبة للناس إلي تستعمل تلفونها في الابحار في الانترنت و مش خاصة بجزيرة تونس و البلوقوسفير التونسي...

اي ملاحظة اخيرة فمة طريقة لفتلي انتباهي ليها برباش لحفظ نصوص اي مدونة في "بلوغر" و هي
settings
basic tools
export blog
و بالتالي يمكن حفظ اي مدونة بشكل دوري في الكمبيوتر الشخصي... و بالتالي في حالة اختفائها القسري يمكن استرجاعها

فعل القرصنة أمر مشين و يلزم الوقوف ضدو بدون تردد مهما كان مأتاه أو المبرر متاعو... لكن قرصنة القرصنة و خاصة توجيه اتهامات بالقرصنة على أساس اللون الفكري أو الايديولجي هي ممارسات عمليا و بالوقت تقلل من الاستنفار المطلوب ضد القرصنة.. و يجعل الناس متشككة و غير متحفزة و بالتالي يسهل عمليات القرصنة الحقيقية... هذاكة علاش الناس المختصة هي وحدها القادرة و المطالبة بش تعاوننا نعرفو بشكل دقيق أسباب حدوثها حالة بحالة


عدد التعاليق: 18

    تعليق: 3amrouch ...  
    6 مارس، 2009 1:18 ص

    طارق
    مانيش باش نقلك زدت كبرت في عيني لانك كبير من قبل
    لكن فقط نشكرك على تدوينتك والاعتراف بالخطا فضيلة
    تيوف طفل باهي وعاقل (عندو شوية اندفاع ممكن) هذيكة طريقتو في التعبير
    نحب زادة نوضح حاجة احقاقا للحق انو ولد جنيف معملش حتى تلميح ولا حتى اشارة لكونو تقرصن من عند اسلاميين ،حكيت معاه ومازلت نحكي معاه وزاد حط على موقع الفايس بوك انو العملية تمت من سويسرا وزيد ممكن كان عندو وسع بال باش يثبت الضرر يقع تعويضو ماديا (ناس منظمة )
    فقط بعض الناس ارادو القفز على الفرصة لتغيير مجرى الاحداث واللعب على وتر الخوف والتعاطف والهروب من النقاش
    موش اول مرة تصير لحكاية وديمة فرد سيناريو غريبة كيفاش لعباد تصدقهم مازالت
    على كل مايعجبك في الزمان كان طولوا واهوكة كل مرة تثبتلنا من الجدي في الحكاية ومن هو صاحب المستوى الهزيل
    شكرا طارق


    تعليق: samsoum ...  
    6 مارس، 2009 2:01 ص
    أزال المؤلف هذا التعليق.

    تعليق: samsoum ...  
    6 مارس، 2009 2:02 ص

    طارق , التدوينة تاع تيتوف في اوت يعترف فيها انو قرصن مدونة البخاري.. هو موش مهم اما فضولي غلبني و نحب نعرف كيفاش طلع خاطيه؟؟
    بصراحة الواحد يحس في روحو ضايع و الماء يجري تحت سقيه في البلوغوسفير وكاينو يتفرج في مسلسل هندي هههههه


    تعليق: Tarek طارق ...  
    6 مارس، 2009 2:13 ص

    عمروش أهلا

    سمسوم... السيد المعني بالأمر بيدو (متاع "بخار أنفاسي") مع اشياء أخرى وضحت الموضوع... هذا ما يمنعش إلي التفدليك الماصت متاع ضربنا و عملنا (متاع تدوينتو) زاد غرق تيتوف... أما من ناحية ولى فيلم هندي فإنو إي فيلم هندي... هههههههه.... و بيناتنا مانحبش نتبع برشة الافلام الهندية


    تعليق: جمال البخاري ...  
    6 مارس، 2009 6:22 ص

    طارق و تيتوف/

    آسف حقا على إقحامكما في المسألة ديه... كان فيلم هندي، و كانت مسألة شخصية

    مع كل احترامي لك.


    تعليق: titof ...  
    6 مارس، 2009 7:26 ص

    شكرا طارق و الموقف هذا يحسب ليك
    بون انا مقلقنيش موقفك في اوت بالعكس ساهملي بطريقة غير مباشرة في كشف رداءة الفلم الهندي
    بون واضح في شكون نقصد
    اما الي يبهت بلحق هو اهيمة البلوغسفار بالنسبة لناس هاذم
    يعني يتجاوز الفضاء الافتراضي متاعو و يولي اولوية حياتية عند برشة مدونين
    وشكرا مرة اخرى


    تعليق: HNANI ...  
    6 مارس، 2009 1:09 م

    يا لطيــــف توا شكون من المعترفين صحيح؟ باهي تيتوف كيف استعرف عطيناه على راسو و عملنا فيه ، وتوا المعترف الثاني شنوا نعملوا معاه؟
    أيا بربي يعيشكم، نوليوش نعملوا في "كاميرا كاشي"؟ و زيد اتوليش فما باندية في البلوقسفار شادة تهدد في الناس ؟
    شيء يفدد بكل سراحة، أنا نكره الباندية و قلال الحياء..سامحوني الله غالب ماعادش فيا


    تعليق: brastos ...  
    6 مارس، 2009 2:10 م

    اهلا
    يبدو انّي عندي علاقة بالموضوع هاذا ، لذلك نحبّ نوضّح حاجات بكل هدوء
    و التعليق باش يكون طويل شويّه لذلك اسف مسبقا

    رغم اني تقريبا خلال كامل شهر اوت كنت مكنّج على التدوين ، الا اني وقت اللي رجعت لقيت زوز احداث تمّو في غيابي و اللي نعتبرهم هامّين "بلوغسفيريّا" : الاول :حجب مدونة صديقنا ابوناظم ، و الثاني : اجماع على اتهام تيتوف بقرصنة مدونة معينة او مدونات

    بحكم غيابي وقتها ما تسنّاليش التحقق و متابعة الجزئيات ، الا انّو من بعد ، "تلقّيت برشه معطيات اخرى من بعض الاصدقاء" اكّدتلي الحكاية هاذي ، و رغم هاذاكه ما اثرتهاش لانّو فات وقتها ، كيما بالضّبط ما ندّدتش بحجب مدونة ابو ناظم لانّو فات وقتها زاده ، مما يخطّأ احتمال ادماج الخلافات السياسية و الفكرية في المسائل هاذي بمجرّد انّي نتسائل من يكون وراء الصنصرة

    التساؤل هاذا ، اللي كلّفو برشه ناس ارواحهم عناء البحث و "التفتيش"في مقاصدو ، ما كانش المقصود منّو اكثر ممّا يحتملو

    امّا احيانا كي واحد يحبّ يلوّجلك على حاجة ، راهو يلقاها حتى من عدم

    توّا خلّينا نكونو معقولين شويّه : تساؤل كيف هاذا : من يكون وراء الصنصرة" اشنوّة فيه من اتّهام لاطراف معيّنه

    و شنوّه فيه من ايحاءات بالاتهام ؟ـ

    ثم انّو مازالت عندي تساؤلات اخرى
    توّ مثلا (اقول مثلا) انت و انا ، من خلال المدوّنات اتّضح اننا ماناش متفقين في الافكار و في البرامج و في الميولات و في الهوايات و في الامزجة و في المنطلقات و حتى في "الكاراكتار" ، اش ملوّجني على البسودو متاعك في مواقع التشات ، و الا المواقع الاجتماعية الاخرى ، و الا في الايميلات ، باش نسهر معاك و الا نثرثر معاك ؟؟؟

    ياخي اش باش يزيدنا هاذا ؟

    نقول الكلام هاذا خاطر انا شخصيا موش مرّه و موش ثنين ، تجيني دعوات للثرثرة و الا طلب صداقة من ناس يعرفو جيدا انّي انا و اياهم لا يمكن انّنا نكونو اصدقاء

    نزيد نكون واضح

    واحد كيما ابو عربي .. الايميلات و التعاليق البذيئة اللي بعثهالي و اللي ما يتحلّش عليها الفم ،( و اللي مستحيل ننشرهم ، احتراما لتجاعيد والدتي اللي ما خلّا ما قال فيها ، اما مستعد نبعثهم في شكل "سكرينبرينت" للّي يحب يتأكّد) و اللي نطــّقني بالشكل هاذاكه ،و قتلو الكلمة هاذيكه باش يبعدني ، و الكلمه هاذيكه راهي تعتبر حكاية فااارغة قدّام اللي يبعثلي فيه هو

    معقولش بعد هاذا الكل يجي يطلب صداقتي عالفايسبوك؟؟؟؟؟؟؟؟؟ راهو شي يهبّل
    رفضت صداقتو
    زاد عاود ، و الحّ على ان نكون اصدقاء ، و حلّي محاضرة في علاقة الحضارة العربية بظاهرة الحقد  ـ
    شنيّه هاذا الكل ّ؟؟
    طيبه ؟؟؟ تبوهيل ؟؟؟ مثاليه ؟؟؟ سماحه ؟؟؟ خلق حميد ؟؟ ياذنوبي

    زدت رفضت ، و بيّنتلو علاش ، و ذكّرتو بكل الكلام اللي قالو في حقّي و في حقّ افراد عايلتي ، و اعترفلي بكل ماقالو ، و قدّم اعتذارو .. و كلّ شي موثّق عندي ، و مانيش نتبلّى على حدّ ، وماذابيّ نعمل مسافة مع ايّ حدّ تنجّم علاقتي بيه توفى بتمرميدة

    بالنسبة لتيتوف ، نفس السيناريو ، جاني عالمسنجر ، و استدعى روحو ، و ثرثرت معاه شوية مجاملة ، و اكيد عندو ليستوريك اللي يبيّن انّي مانيش ماخذو مأخذ الجدّ

    تي انت عارف انّو ايّ كونتاكت بيناتنا ينجّم يفضي لنتيجة سيئة ، اش مجيّبك على ساحتي ؟؟

    ياخي انا اللي مشيت للعباد نّفّر في حناكي في المسنجر عقابات الليالي ؟؟؟؟

    ياخي انا اللي باعث نطلب في صداقة شخص سمّعني اخيب كلمة ينجّم يسمعها رجل ؟؟؟؟؟؟

    ياخي انا اللي مصوّر العباد باساميهم في شكل حيوانات ؟؟؟؟؟

    ياخي انا اللي باعث ايميل للناس نقوللهم : شكرا لانّك ذكرتنا بفاضل ساسي (صادق ساسي كيما قال هو)؟؟؟؟

    ياخي انا اللي مدخّل نسنوستي بين عباد يفدلكو على تذوّق نوع جديد متاع بيرة ، و نقوللهم ياهمّال و يا متاع كحول للشعول ؟؟؟؟؟؟؟

    ياخي انا اللي نتهكّم على اشخاص العباد في المهن متاعها ("معلّم الثمانينات مع الاسف" كما قيل لي ) ؟؟؟؟؟

    اعصابي و طاقة تحمّلي و وسع بالي و رحابة صدري (كيما أي واحد طبيعي نتصوّر) ياقفو وقت يتلفّتلي واحد لا كلّمتو، لا درت بيه، و مانيش معمّر بيه مخّي اصلا ، يتلفّت يقلّي "هامل" و يقلّي" انت متاع كحول للشعول" ـ

    شمعناها "هامل" ؟؟؟ـ

    و شنوّه درجة صداقتنا و الا حميميتنا باش نقبل منّك كلمة كيف هكاكه؟
    ما نقبلهاش في حتى سياق
    فدلكه ؟ كلوف ؟ تمقعير ؟ تنسنيس متاع ناس ما عندها ما تعمل ؟

    كلمة هامل بالنسبة ليّ ماهيش شويّ ، و من حقّي نردّ عليها بالشكل اللي نراه يريّحني ، و نولّي نقول كل شيء ، و دون ندم بالطبيعة ، لانّي ما نندمش الا وقت اللي نكون انا اللي بادرت بالخطأ في حق الاخرين و الا بظلمهم

    و فعلا ، كانت طريحة الشعفة .. من وقتها لا دار بيّ لا كلّمني

    نسنستش انا على حد اش يفدلك هو و اصحابو ؟؟؟
    طلبتش منك تكون صاحبي ؟؟؟
    راسلتكش ؟؟

    بعد هاذا
    كي واحد يحب يتنفّس بكلمة ، يولّي هو اللي عامل فيها ضحيّة ؟؟؟ و يولّي مبالغ في اعتبار شخصيتو الافتراضية ؟؟

    لا عاد
    Je suis désolé

    طيب ، قد اكون انيقت مرة او اكثر في بعض النرفزات او احتداد النقاشات و الاستفزاز في افكار العباد موش في اشخاصها و مهنها و تشبيهها بالحيوانات و ما الى ذلك

    قد يكون الواحد مازالت تجبدو شويّه سلوكات الجامعة و ينخرط في "خصومات" ـ

    لكن نحب نعطي معلومه هنا ليك و للناس الكل ، انا خويا (شقيقي) كان قريب ياسر من الاسلاميين ، و ضربّلها سته اشهر في 93 و الا هي 94 .. و عايش انا واياه في نفس الدار تحت نفس السقف ، و نعتبرو اقرب صديق ليّ ، وتعلّمت انا و هوّ انّا نحطّو ما يمكن انّو يجمعنا هو الاساس ، مثلا عندنا نفس الذوق الموسيقي ، نفس التفدليك ، هو يحب الجارديناج ، و انا نعاون فيه على الحكاية هاذي و نهديلو في الزرارع و النباتات النادرة ، و نكون سعيد وقت يفرح .. لكن وقت يجي مناسبة متاع نقاش نتناقشو .

    جبدت المثال هاذا باش نعطي فكرة على انّي عايش في الاختلاف منذ نعومة اظافري ، هو و لا عمرو قال لي "هامل" كي يشم عليّ ريحة البيرة .. بالعكس .. يتبسّم و يغمزني بضحكة  و انا ولا عمري ما مسّيتو في مصاحفو و الا في سجادة صلاتو

    نرجعو لزبراط

    اذا انت اكدّلك زبراط بشكل مباشر انّو متشكك في اسباب قرصنة مدوّنتو
    انا زادة اكّدلي زبراط بشكل مباشر انّو بعد ثلاثة ساعات من طلب صداقة عالفايسبوك بعثهولو ابوعربي ، اختفت مدوّنتو ، في نفس النهار اللي بعثلي فيه انا ابوعربي طلب صداقة و رفضت
    يعني هو ماهوش متاكّد ،صحيح ، لكن عندو شكوك .

    و انا نوجّهلو دعوة من هنا انّو يكون واضح اكثر ، يعني ، يا : شاكك ، يا : لا

    ثمّ بعد هاذا الكل
    باللاهي اشنوّه هالغرام بالـ"خصوم" ؟؟؟
    شنوّه هاللهفة على مزيد الاقتراب من "الخصوم" ؟؟؟ حتّي في صفحاتهم الشخصية الاخرى ؟؟؟

    تي ياخي تباركلّه هاي المدونات كلّ مرّة تتحوّل الى مجال متع بيك و عليك ، و يعطيك و يجيك
    لازم نزيدو نمرمدو بعضنا في التشات و في الايميلات و في الفايسبوك
    موش كان نّفّسو بعضنا شويّه خير ؟

    صراحة لا يمكن لي انّي نصدّق انّو شخص بالامس سمّعنا بعضنا كلام خايب ، انا و هو ، ليوم يجي يطلب في صداقتي ، و بالحاح كبير ، و كبير برشه زاده .. لا يمكن ان آخذ الحكاية ببراءة

    انا معاك في انها ماهيش ادلّة قاطعة
    لكنّ نسبة براءتها و عفويّتها ضئيلة حسب تصوري .. لانّو ببساطة اللي يوصل يتمكن من التقنيات كيف هكّاكه تسمحلو باش يدمّر المواقع و المدونات ، ما نتصوّروش انّو يغفل و يخلّي دليل قاطع وراه

    و انا بصراحة نتوقّع كل شي .. ينجّم يكون نفس الشخص هو اللي عامل خمسه و ستّه مدونات و يمثّل علينا بيهم..يعني ، رغم انّو "إنّ بعض الظن اثم" الا انّي اميل الى الاعتقاد الى انّ اعتراف "بخار انفاسي" لا يعني شيئا

    بل اكثر من ذلك .. انا اميل الى الاعتقاد في عدم وجود مدوّن اسمو بخار انفاسي اصلا..ما الذي يمنع من الاعتقاد انّو مدوّن وهمي .. من صنع مدوّن أخر..لصياغة سيناريوات تافهة

    كل شيء جائز

    معذرة على الاطاله..شكرا


    تعليق: titof ...  
    6 مارس، 2009 3:26 م

    و اغرروقت عيناه بالدموع
    متحشمش على روحك راجل في عمرك ومربي و تكذب
    انا عمري مجبدتم وعمري مدرت بساحتك قبل انتي متجبدني
    نسيت شكتبت في مدونة الناقد وهناني
    وجيتك حتى لمدونتك وقتلك ميجيش الكلام ومجبدتكش وهاني شادد تركينتي
    اما زايد ان لم تستحي فافعل ما شئت
    زيد استمني و زيد ابكي طريقتكم في العويل معروفة يا جيل الهزيمة و الانبطاحية
    معاتش تجد علينا
    سمومكم معاتش تأثر في صحتنا احمد الله اني لم اعرف اشخاصا مثلك في الدنيا رغم اني عرفت المستويات الكل اشباه المثقفين متع القوالب الجاهزة وتقشيش الحناك
    غريبة انو معلم كيفك وصاحب رسالة يجي يبكي ويكذب جاهر في النهار غير مبالي بالمصداقية متاعو والا حتى عمرو
    وهذا موش غريب على ولد البيران و العرك
    وكتلة عقد يهزها تعليق متع مجهول و يخليها تشتق ابشع انواع السباب وتكيلو لشخص معندو حتى علاقة
    انا امي اشرف منك و من قلمك المأجور
    و كان عيني باش نسبها امك راني سبيته نهارت الي اسقطت قناعك و قتها قتلك علاش انا منسبش الوالدين على خاطرني نحترم الام و نعظم دورها
    اما الله غالب ان لم تستحي فافعل ما شئت
    ولا اجد الى ان ارسلك الى نفس المكان الذي ارسلت اليه انت ابو العربي
    و كما تقول انت
    بكل فخر و بكل ثقة و بكل اعتزاز


    عذرا طارق و نعرف انك متحبش تكون مدونتك بطحاء لصرعات و بطولات وهمية اما هاك تشوف
    العقد
    ولايسلم الشرف الرفيع من الاذى
    حتى تراق علة جوانبه الدماء


    تعليق: titof ...  
    6 مارس، 2009 3:28 م

    امي هناني نستنى فيك تاخو موقف شجاع كيما خذيتو اول مرة
    منيش نستنى فيك تندد بالباندية انا من لول قلت مقرصنتش و خاطيني
    في مدونة طارق
    و الحكاية حكاية شخصية ما بين بخار و اربيكا مشيت انا في الساقين الله غالب مهر الاميرة


    تعليق: brastos ...  
    6 مارس، 2009 3:33 م

    رجاء طارق وسّع بالك معايا شوي
    مانيش طالب "الانصاف" .. طالب التوضيح
    فقط



    كتب عياش تدوينتو على نظرية التطور ، و كان لي فيها التعليق الثامن هنا

    http://3ayechmelmarsa.blogspot.com/2009/02/blog-post_13.html

    اللي وجّهت فيه نقدي لنسق فكري معين ، و ما مسّيتش فيه حتّى شخص بعينو

    و كردّ على التدوينه بتعاليقها ، جات التدوينه هاذي
    خاصة في الجمل الاخيرة

    http://scoubidou1.blogspot.com/2009/02/blog-post_14.html

    اللي تناولت اشخاص وموش افكار

    في المقابل

    التدوينه اللي مسّتني في شخصي و في مهنتي ، هنا

    http://scoubidou1.blogspot.com/2009/03/blog-post_04.html

    ردّيت على مولاها في النسق الفكري متاعو و ما تعرّضتش لا لشخصو و لا لمهنتو
    هنا
    http://kahaw.blogspot.com/2009/03/blog-post_736.html

    يظهرلي في المناسبتين هاذومه اللي ما عندهمش اسبوعين فقط تقريبا ، واضح شكون اللي يبادر باستفزاز المدونين في اشخاصهم

    هاذاكه علاش ، اللوم على ردرد الفعل اللي تنجم تكون عنيفة احيانا،و اعتبارو تمسكين و تمثيل دور الضحية ، لوم ماهوش شرعي بدرجة كبيرة


    تعليق: brastos ...  
    6 مارس، 2009 3:50 م

    "انا عمري مجبدتم"

    طيّب

    و هاذا شنوّه

    http://kahaw.blogspot.com/2009/03/blog-post_7703.html


    تعليق: FREE-RACE ...  
    6 مارس، 2009 4:13 م

    :)


    تعليق: titof ...  
    6 مارس، 2009 4:58 م

    وقتاش قلتو انا هذاكة
    موش قلتو بعد زوز تعليقات متاعك
    وكلمة فرخ الي تجري في المدونات وتعاود فيها
    اما زايد ان لم تستحي فافعل ما شئت


    تعليق: Tarek طارق ...  
    6 مارس، 2009 5:23 م

    تيتوف... أهلا بيك... توة جا الوقت لقلب الصفحة.. و قبل ما نعلق على كلام براستوس أرجو منك أنك تبدى من الآن تجنب الدخول في صراعات مع أي مدون.. في مدونتي أو مدونتك.. أبدى صفحة جديدة... احترم الي يحترمك و تجنب إلي ما يحترمكش... مش ضروري الصحبة الافتراضية (عبر الميسنجر أو السكايب أو غيرهم...) بين المدونين سواء مختلف معاهم و إلا حتى متفق معاهم.. إذا كان جات بطبيعتها الصحبة و بسلاسة فبها ماكانش مش مهمة برشة... صحبة الحياة تبقى دائما أفضل من الصحبة الافتراضية... الشخصنة ساعات تخسرك ناس ربما تكون علاقتك بيهم أفضل لو قعدتو بعاد... و ربما مواقفكم مش متناقضة بشكل مطلق (لأني مثلا نعتقد أنو الخلاف الفكري بالتحديد بينك مثلا و بين براستوس أو بين براستوس و عمروش على سبيل المثال مش بالحدية المطلقة إلي يظهر عليها) لكن الشخصنة تهز لنهايات غير ضرورية و تعمق الخلاف الفكري و السياسي...

    هذية ملاحظة ودية نتمنى أنك تاخذ بيها... من اللحظة هذية رجاءا


    تعليق: Tarek طارق ...  
    6 مارس، 2009 5:25 م

    هناني.. بالضبط موضوع التصرف بطريقة الباندية... هذا الموضوع إلي قلقني.. حتى من غير قرصنة موضوع كيف هذا يقلق...


    تعليق: Tarek طارق ...  
    6 مارس، 2009 5:42 م

    براستوس.. خلي نقول من البداية و قبل الدخول في أي تفاصيل أنو المقصود مش إنت بالنسبة لموضوع "قرصنة القرصنة".. إنت في جميع الأحوال تسائلت.. وضعت أسئلة و شكوك في فقرة صغيرة ما فيهاش تأويل... و لو أنو فيما بعد السجال إلي دخل في امور شخصية بينك و بين عمروش مشيت لصراع آخر فكري و سياسي.. و الحقيقة بالرغم من اهتمامي مثلك بـ"نقاش هادئ" حول موضوع الاسلاميين و الاسلام السياسي ما نراش كيفاش أي نقاش هادئ ينجم يصير في سياق صراع ولى مشخصن...

    المقصود هومة الناس إلي كتبو بوضوح و بدون تردد أنو الفاعل هو طرف محدد... كيف العادة بدون تقديم أي أدلة

    و "زبراط" قال عندو شكوك.. قالي على موضوع طلب الصداقة لكن قال أيضا إلي تنجم تكون حاجة أخرى خاصة بعد ما فهم مشكل استهداف الناس إلي عندها آي فوون للابحار في الانترنت لسرقة معلوماتهم الشخصية.. و بيناتنا هذية مسألة جراتلي لية أنا في الأشهر الفايتة.. على كل إذا كان تثق في برباش ينجم يحكيلك أكثر على الموضوع المعقد هذاية

    بالنسبة لموضوع "بخاري" فإنو واضح موضوع مشخصن و يبدو ما عندو حتى علاقة بالبلوقوسفير في أصلو و لا مصري لا حتى شي.. لكن لأنو الموضوع يتعلق بحياة الناس الشخصية فإنو هذية أمور لا أسمح لنفسي في الدخول فيها فما بالك الحديث عنها في فضاء عام و طبعا هذاكة علاش ما نجمش نفصل أكثر ملي قلت.. لكن أنا شخصيا مقتنع الآن إلي الموضوع مفبرك.. إذا كان باقي عندك شكوك في علاقة بأي مدون فهذا موضوع آخر يلزم طرحو بشكل مستقل على الحادثة إلي جرات في أوت

    بالنسبة لبقية الموضوع و تحديدا موضوع طلب الصداقة أو الصحبة فإنو برغم جهلي بالتفاصيل إلي الأكيد تعرفها إنت و المعنيين بالموضوع لإغني نتفق معاك في مبدأ أنو الصحبة غير ضرورية و ما فماش علاش يصير تشات أو غيرو مشخصن... يجب التفريق بين التدوين و الحياة الشخصية... إلا إذا جات الصحبة بطبيعتها عادي


    تعليق: jaccuze ...  
    7 مارس، 2009 2:11 م

    بربّكم جميعا
    لا تأخذوا تدخلي على محمل الجد
    لكنّ سؤالا أبى فضولي أن أغادر الموقع بعد قراءة التدخلات دون أن أطرحه
    وهو الآتي:
    بعد سبعة عشر تعليق وفي ظرف زمنيّ قياسي لا أجد أثرا لواحد هو أكثر المعنيّين أمرا بالموضوع.....أبو عربي!!!!!

    هذا الّذي، منذ أن نفخ فيه إلاه الإفتراض روحه، لا أكاد أطرق باب مدوّنة إلّا ووجدته يساهم في "إثرائها"
    هذا الّذي لا يخطئ اللّحظة المناسبة ليترك آثار مخالبه في مدوّنات "أعدائه"....
    هذا الّذي لا أعتقد أن من يراقب حركة التّدوين في الفضاء التّونسي سوف يقرّ بأنّ له إضافة إيجابيّة
    هذا الّذي إن كان لأحد سلطةً مّا عليه ليأمره بقلب الصّفحة....فليفعل!

    لأن ذلك في صالحنا جميعا
    وشكرا



طارق الكحلاوي
نشأ طارق في أحد مدن الضواحي مدينة رادس الواقعة في الجمهورية التونسية. يشغل الآن موقع أستاذ في جامعة روتغرز (قسمي التاريخ و تاريخ الفن). تلقى طارق تكوينه الجامعي في جامعة تونس (كلية 9 أفريل، إجازة و دراسات معمقة في التاريخ و الآثار) و جامعة بنسلفانيا (رسالة دكتوارة في تاريخ الفن). و يعلق بانتظام على القضايا و الاوضاع العربية باللغتين العربية و الانجليزية في مواقع و صحف مثل "الجزيرة.نت" و "القدس العربي" و "الحياة" و "العرب نيوز" و "ميدل إيست أونلاين"، و يكتب عمودا أسبوعيا في جريدة "العرب" القطرية. يكتب أيضا في قضايا ثقافية و نظرية تخص الاسلام المعاصر في المجلة البيروتية "الآداب". و تمت استضافته للتعليق في قناة "الجزيرة الفضائية" و قناة 13 "بي بي أس" (نيويورك).

Tarek Kahlaoui
Tarek grew up in the suburban city of Rades in Tunisia. He is currently an Assistant Professor at Rutgers University (a joint position in the Art History and History departments). Tarek graduated from the University of Tunis (Bach. and DEA in history and archeology) and University of Pennsylvania (Ph.D. in history of art). Tarek also comments regularly in Arabic and English on Middle Eastern issues and politics in Aljazeera.net, Al-Quds Al-Arabi, Al-Hayat, Arab News, and Middle East Online, and writes a weekly column for the Qatari newspaper Al-Arab. He also writes on intellectual and theoretical issues related to contemporary Islam in the Lebanese magazine Al-Adab. He was also invited to comment in Al-Jazeera Channel, and in Channel 13 (PBS-New York).