بعد جمعتين عديتهم نجري من بلاصة لبلاصة في تونس و انقطاع عن التدوين رجعت لفيلادلفيا للمشاركة في حفل التخرج.... في الجامعات الأنقلوسكسونية حفل التخرج حاجة مهمة برشة عندو طقوسو و أجواؤو الخاصة... و بصراحة نتمنى أنو التقاليد هذية تنتقل لجامعات العالم الكل (و كل واحد طبعا ينجم يعطيها الصبغة المحلية متاعو) لأنها تحتفل بمجرد التخرج و تعطي قيمة معنوية كبيرة للشهادة.... هذية مسألة تولي مهمة خاصة في أماكن بدات الشهادة الجامعية تفقد في قدرها و قيمتها... على كل بالنسبة لتقاليد حفل التخرج فإنها مش مجرد لبسة أكهو بل طقوس تقتضي المشي بشكل جماعي و المشاركة في حفل جماعي بحضور هيئة التدريس متاع الكلية متاعك (مثلا كلية الفنون و العلوم و إلا الطب...) و عائلات الطلبة و يتم فيه تسليم الشهادة بشكل شخصي... الحفل هذا يسبقو حفل جماعي متاع كليات الجامعة الكل تصير فيها مسيرات جماعية منظمة لمكان الاجتماع و كلمات لشخصيات و عادة يتم استضافة متحدث مشهور لاستخلاص العبر من تجبرتو في الجياة العملية... المرة هذية في جامعتنا استضافو مايكل بلومبرغ (عمدة نيويورك و صاحب مجموعة بلومبرغ الإعلامية) إلي عمل برشة نكت و قال إلي بيه الفايدة في نصف ساعة (خاصة موضوع تسهيل هجرة الأدمغة و الصراع حول موضوع ملكية السلاح و اللوبيات في واشنطن... كلام كان فيه دعم مبطن لأوباما) و لو أنو بلومبرغ يظهرلي شخص ياسر انتهازي على المستوى السياسي (متقلب حسب الوضع من جمهوري لديمقراطي لمستقل) بالرغم هذا ما ينقصش من نجاحاتو و نزعتو التجديدية على مستوى مسيرتو الاقتصادية (يمكن مشاهدة الكلمة متاعو هنا)... على كل كان حفل التخرج نهار مليان باللقاءات و كان أحسن توديع لمقعد "الطالب" الرسمي نحو مقعد جديد يقعد في النهاية مقعد طالب العلم... خاصة أني شخصيا بش نقعد ضمن الأجواء الجامعية (لكن من موقع المدرس المرة هذية) و مش بعيد جغرافيا على الجامعة إلي قريت فيها

عدد التعاليق: 10

    تعليق: 3amrouch ...  
    21 ماي، 2008 7:17 ص

    الف مبروك دكتور


    تعليق: Bechir ...  
    21 ماي، 2008 7:21 ص

    أيا إينشالله مبروك والعاقبة لولدك :-)

    حتى انا كنت في تونس الثلاثة جمعات الفايتة و complètement déconnecté زادة. تي هاي لاحمة البلوغسفير هالأيامات...


    تعليق: om youssef ...  
    21 ماي، 2008 9:07 ص

    saha saha l bou fadfoud.mala wahra ya docteur....


    تعليق: Bel Malwene ...  
    21 ماي، 2008 10:26 ص

    نشالله مبروك يا د. طارق ... وتاك الشابو هههههههههههههههه


    تعليق: Tarek Kahlaoui ...  
    21 ماي، 2008 12:24 م

    عمروش.. شكرا يا سيدي.. أما انبه عليك هذية آخر مرة تعيطلي دكتور... أية ولد حومتي العاقبة ليك و لأبنائك

    بشير... العاقبة ليك يا راجل إنت عادة قريب ياسر... خسارةما تلاقيناش في تونس... "لاحمة" باللحم... الكيو علوش حليب 9000... شي يأسف

    أم يوسف... العاقبة ليوسف الفزغول... أما على شرط يرقد بكري
    :)

    مروان... فقت بية... أنا شادد روحي بالسيف بش مانحيتهاش


    تعليق: Carpe Diem ...  
    21 ماي، 2008 1:15 م

    Mabrouk


    تعليق: info ...  
    21 ماي، 2008 2:08 م

    aya mabrouk fadfoud...

    Search for models new york


    تعليق: Slim ...  
    26 ماي، 2008 3:11 م

    5latt imma5er mabrook ya tare9 inshallah min 7asan il a7cen!
    :)
    wmabrook zada lil club


    تعليق: Werewolf ...  
    28 ماي، 2008 10:56 م

    مبروك يا طارق المرة هاذي أوفيسيالمون... أما ملاّ مايكل بلومبرغ و ملاّ تقتوقة
    :)


    تعليق: abunadem ...  
    9 جوان، 2008 4:59 م

    مبروك لخويا طارق
    اما باهية الطربوش المربع يعمل وهرة
    اما بالك تبدا من الجماعة اللي لوحوا طربوشهم الشرقي ونحوا العمامة ؟؟؟



طارق الكحلاوي
نشأ طارق في أحد مدن الضواحي مدينة رادس الواقعة في الجمهورية التونسية. يشغل الآن موقع أستاذ في جامعة روتغرز (قسمي التاريخ و تاريخ الفن). تلقى طارق تكوينه الجامعي في جامعة تونس (كلية 9 أفريل، إجازة و دراسات معمقة في التاريخ و الآثار) و جامعة بنسلفانيا (رسالة دكتوارة في تاريخ الفن). و يعلق بانتظام على القضايا و الاوضاع العربية باللغتين العربية و الانجليزية في مواقع و صحف مثل "الجزيرة.نت" و "القدس العربي" و "الحياة" و "العرب نيوز" و "ميدل إيست أونلاين"، و يكتب عمودا أسبوعيا في جريدة "العرب" القطرية. يكتب أيضا في قضايا ثقافية و نظرية تخص الاسلام المعاصر في المجلة البيروتية "الآداب". و تمت استضافته للتعليق في قناة "الجزيرة الفضائية" و قناة 13 "بي بي أس" (نيويورك).

Tarek Kahlaoui
Tarek grew up in the suburban city of Rades in Tunisia. He is currently an Assistant Professor at Rutgers University (a joint position in the Art History and History departments). Tarek graduated from the University of Tunis (Bach. and DEA in history and archeology) and University of Pennsylvania (Ph.D. in history of art). Tarek also comments regularly in Arabic and English on Middle Eastern issues and politics in Aljazeera.net, Al-Quds Al-Arabi, Al-Hayat, Arab News, and Middle East Online, and writes a weekly column for the Qatari newspaper Al-Arab. He also writes on intellectual and theoretical issues related to contemporary Islam in the Lebanese magazine Al-Adab. He was also invited to comment in Al-Jazeera Channel, and in Channel 13 (PBS-New York).