من أشهر الدربيات في إيطاليا و في العالم بشكل عام: الميلان ضد الانتر إلي بش يتلعب نهار الأحد هذا... المقطع هذاية المعروف إلي يمثل التنافس بين زوز معلقين واحد يحب الانتر و لاخر يحب الميلان (روسي و كرودلي) يلخص شنوة المقصود بكلمة دربي في إيطاليا... و شنوة المقصود بالكرة أصلا.. و هذية حاجة ما تتحس كان إذا كان واحد يحضر في الستاد... حضرت مرة برك في مقابلة متاع كرة في إيطاليا... مقابلة بين روما و الانتر في "الأولمبيكي"... مقابلة كبيرة أما ما نتذكرش تفرجت في حاجة كبيرة... أغلب الماتش قعدت نتفرج في الجمهور... "النشيد الوطني" متاع روما... تبادل "القذائف النارية" كايينا في بيروت عام 82... الفيراج متاع روما (بدون تعليق).... و حرب الشعارات و الحركات المتبادلة... مقابلة أخرى في المدارج... حاجة خارقة للعادة ما عمري ما ننساها... و طبعا الأمور تشعل وقتلي يبدى فمة دربي... و يظهرلي ما فمة أكثر حماس من دربي الميلان و الانتر كان دربي روما و لاتسيو....

فمة ملاحظة على كلمة "الدربي" و استعمالها في تونس: مرة فمة ممرن جزايري سئلوه على راييو في "الدربي" في تونس... آخي جاوب قاللهم أناهو "دربي"... الصحفي قعد باهت قالو بالطبيعة "الدربي متاع الترجي و الافريقي"... الممرن الجزايري قعد باهت في الصحفي التونسي... ما لقى ما يقلو على خاطر بكل بساطة لأنو في الجزاير كلمة "الدربي" تعني معناها الحقيقي إلي هو مقابلة أجوار أو زوز فرق من مدينة وحدة... لكن في تونس معنى الكلمة ضاع و بلعتو مقابلة "الترجي و الافريقي"... في الحقيقة كان فمة دربيات في تونس مش دربي واحد: مثلا "النادي الصفاقسي و الحديد الصفاقسي"...

على كل حال انشالله تتعدى مقابلة حلوة نهار الأحد و بالنسبة لي ماعادش مهم شكون يربح... و لو أني ماذابية إلي جوور كبير كيف كاكا ديما يربح