ليوم تلهيت شوية و ما تبعتش تفاصيل الانتخاب في ساوث كارولاينا.... كنت قلت في السابق إلي أوبماما سايي انتقل الى موقع "زعيم في الحزب الديمقراطي"... ربما حتى أكثر من هكاكة: زعيم غير نمطي.. نقطة الانتقال في اتجاه الصفة الكاريزمية هذية صارت حسب رايي ليلة الخطاب الغير عادي إلي عملو وقتلي خسر في نيو هامشير (هنا).... إذا بغض النظر على هوية المرشح النهائي على الحزب الديمقراطي، سواء كان أوباما و إلا لا، فإنو نجح بش يخلق لروحو موقع أكبر من الهوية السياسية متاع مجرد مرشح في انتخابات الحزب الديقمراطي...

الربح ليوم في ساوث كارولاينا كان متوقع... نقصد لهنا أنو بخلاف استطلاعات الرأي النهارين لخرين إلي اتفقو على أنو أوباما هارب على هيلاري... لكن كانت متوقعة لأنو ساوث كارولاينا أكثر ولاية فيها ناخبين أفارقة... و الشي جديد في الأسابيع لخرة أنو أوباما كبرت الشعبية ماعو بشكل كبير بين الناخبين الأفارقة في وقت كانو مش متحمسين ليه برشة قبل.... أما حتى حد ما كان يتوقع إلي بش يربح بنسبة 55%... فوز ساحق... هذا بعد كل الهجوم و الشخصنة إلي قادوها آل كلينتون (هيلاري و بيل) في ليامات لخرة....

على كل واضح توة لومور بش تتحسم نهار 5 فيفيري إلي بش تصير فيه انتخابات برشة ولايات مهمة... هذاكة علاشة يتسمى لهنا "الثلاثاء الكبير"...
Big Tuesday

المعركة حامية... أهم حاجة يلزم أوباما يحافظ على البروفيل إلي بدى بيه: يعني أنو مرشح لطيف من الناخبين متعدد الأعراق و الديانات... و مختلف بشكل كبير على حسابات السياسيين متاع واشنطن...