برنامج تولك شوو الذي نقوم ببثه على الهواء في إذاعة "تونس زوون" كل يوم سبت (حوالي الساعة التاسعة ليلا توقيت تونس) سيكون موضوعه هذه المرة الوضع الراهن في قطاع غزة (رابط للاستماع للبث المباشر)... يمكن الاتصال على الهواء إما عبر صندوق الدردشة (التشات) المتوفر على الصفحة الأولى لموقع إذاعة "تونس زوون" (هنا) أو إرسال رسائل على عنوان السكايب الخاص بالبرنامج
tuniszone show

سنحرص هذه المرة على نسجيل حصة هذا الأسبوع و تنزيلها على موقع رديون

تجب الإشارة هنا إلي أن عضو فريق "رديون" صديقنا المدون البرباش قام بتصميم جديد رائع لموقع "رديون"... و حدك يا برباش

هناك أيضا على ما يبدو حملة في أوروبا لإطفاء الأضواء يوم 24 جانفي بين الساعة الثامنة و الثامنة و عشرين دقيقة ليلا... على كل حال شكل من أشكال إبداء التضامن يناسب وضعية العجز العام و أعتقد أنها ستكون معبرة جدا لو تم تبنيها في أماكن لا يمكن فيها حتى حمل الشموع في الشارع

صور من غزة أفضل من آلاف الكلمات




روابط أخرى
عريضة 1
عريضة 2
فايسبوك
حملة

في علاقة بموضوع الدعوى المرفوعة ضد سماح إدريس و الذي تعرضت له سابقا في المدونة (هنا و هنا) و في مقال (هنا): تزايد التضامن مع الصديق سماح من خلال تعدد المقالات و إنشاء موقع (هنا) و مثلما لفتت الانتباه صحيفة الأخبار اللبنانية اليوم (هنا) توجد عرائض مختلفة بما فيها واحدة تونسية على هذا الموقع باللغتين العربية و الانجليزية للتضامن مع سماح... أدعو جميع قراء هذه المدونة المبادرة الى التوقيع على العريضة أو العرائض.. يجب أن أشير الى ما قاله لي سماح في آخر مراسلة منذ أيام: "حتى و إن تمت إدانتي فسأخرج من هذه المحاكمة مرفوع الرأس بعد كل هذا الدعم"... يشير ذلك الى أهمية الدعم المعنوي في مثل هذه الحالات

المشكل طبعا مش مجرد انقطاع الكهرباء و تأثير هذاكة على... مثلا الفرجة في التلفزة.. و إلا تشعيل الضو بش الناس تسهر... المسألة أعمق من هكاكة ببرشة... طبعا فمة التأثيرات العامة... على الصرف الصحي و التجهيزات الطبية... و لهنا تسئل المذيعة في لخر السؤال إلي يوجع: شكون بش يبداو يسكرولو الماكينة قبل... الرضيع إلي مازال كي تولد و إلا الطفل إلي عايش بجهاز غسل الكلى؟

أما الظلام لهنا عندو تأثيرات أخرى: الإحساس بأنك عايش في ما قبل المجتمع الصناعي... أنو ينجمو بكبسة زر يرجعوك الى مرحلة تاريخية سابقة (كيفما لمح أولمرت وقتلي قال أنو الناس في غزة يلزم تتعود على المشي على الساقين!!)....

لكن ربما هذية فرصة بش بعض الناس تحاول تراجع مفاهيمها للصراع الحالي... هل هذا مجرد "رد فعل على الصواريخ الفلسطينية" القادمة من غزة كيفما تقول الناطقة متاع الحكومة الإسرائيلية و يعاودو مبعدها بعض الناس المعقدين و المتوترين؟

هل إستعمال القوة الطائش و المتعجرف متعدد الأشكال العنيف و الصامت (كيف قصان الكهرباء) هو حاجة ناتجة على رد فعل أم هي سياسة قديمة ثابتة تعتمد على فكرة أنو هذية "أرض بدون شعب" أو أنو "الشعب لا يستحق الحياة" بكل بساطة؟

مثلا في الشريط الوثائقي هذاية (هذا جزء فقط منو) إلي عملتو "القناة الرابعة" البريطانية و إلي المذيعة متاعو ما نجموش نتهموها بأنها "عميلة" متاع حماس و إلي تعمل في غزة:

كيفاش انجمو نفسرو استعمال القوة و العنف بالشكل الهمجي هذاية؟ الاستهداف الممنهج و المتعمد للمدنيين؟

طبعا فمة النوعية متاع المتوسطين إلي موجودين بيناتنا و إلي يعاودو كي الببغاء كلام القناة الثالثة الاسرائيلية (مش حتى لولة) و إلا إذاعة "جيش الدفاع الإسرائيلي" متاع أنو الفلسطينين هوما إلي يسهتدفو "المدنيين"... لكن الوضعية هذية مش جديدة... تاريخ المجازر الإسرائيلية ماعادش مجرد دعاية سياسية كيفما كان البعض يقول... مؤرخي "مدرسة المراجعة التاريخية الاسرائيلية" نفسها أثبتو قدم و ثبات سياسة إستهداف المدنيين هذية... يعني هذا قبل صواريخ غزة.. و أصلا قبل حماس و "كتائب..." و "جبهة..."... و بعد هذا و ذاك يجيك حاشاك واحد بهيم ما يحشمش يقولك: "شفت كيفاش؟! ماهو من صواريخ حماس!"... المعضلة أكثر من هكاكة أنو أصلا حماس عاملة هدنة و هي أصلا تحاول بش تقنع لخرين بالهدنة... لكن بقية الفصائل رافضة و حماس ما هياش من سياستها الدخول في حرب مع فصائل فلسطينية أخرى على قاعدة اتفاقيات ما فمة حتى شي يضمن أنو الطرف الإسرائيلي بش يحترمها...

فمة طبعا النوعية المتوسطة في أمخاخها و إلي تحب تلوج على ما يأكد أفكارها الديماغوجية و الجامدة بغض النظر على الجرايم إلي قاعدة تتعمل... فوق هذاكة يتم تبرير مواقف كيف هكة تحت عناوين "التنوير" و "العقلانية"... يقولك مثلا إلي الظلام إلي في غزة ناتج على "ظلامية" حماس العقائدية و السياسية.... النوعية المتوسطة هذية عموما تجهل و/أو تتجاهل معطيات معروفة في تاريخ الصراع... يلزمنا مثلا نذكروها إلي الساحة الفلسطينية تعدات عليها جميع الرؤى الفكرية و الايديولوجية... بالعكس كانت في فترة من الفترات "عقلانية" قانية.... و برغم هذاكة تواصلت السياسة الإسرائيلية هي نفسها... وقتلي بدات السياسة هذية عام 48 ما خمموش شكونو الفلسطيني: زعمة "عقلاني" يسمحلنا بش نبركو عليه؟ و إلا "ظلامي" ما يسمعش الكلام ما يسمحناش بش نبركو عليه؟ لا، بكل بساطة حطوها لكل في شكارة وحدة... و بدا العنف و التدمير المنهجي...

كتبت في مرة سابقة (هنا)، و قتلي صارت "حرب تموز" على حزب الله و لبنان، على ما نعتقد أنو الرؤية الاستشراقية الكولينيالية إلي تقف ورى سياسات من النوع هذاية... ملخص الموضوع أنو فمة فهم للطرف المقابل (الفلسطيني، العربي، المسلم...) أنو ما يستحقش مواصفات الانسانية و إلا في أقل الاحوال ما يستحقهاش كيف يستحقوها هوما...

هذاية هو معنى و مصدر الظلام إلي في غزة!

الحقيقة نحب نقول إلي مدونة الرديون قاعدة تتوسع بشكل سريع فرحنا برشة... عدد متزايد من المدونين قاعدين يساهمو فيها... المرة لخرة بعد الحوار على موضوع مسابقة المدونات دخلنا في نقاش موضوع إذاعات الانترنت: السبب إلي خلانا ناقشو الموضوع هو أنو يسرا عرفتنا على المشرف على إذاعة "تونس زوون"... خونا مجدي إلي يقوم بعمل تطوعي هايل برشة حلينا معاه موضوع إذاعات الانترنت و كان حاضر معانا زادة راديو نجوي إلي كان ينشط في إذاعة محلية في "إي هاش أو سي"... كان حوار هايل برشة (رابط الحوار على الرديون)... الحاصل مجدي عبر على اهتمامو بحوارات الرديون و اتفقنا أنها بش تولي تتعدى مسجلة على إذاعة "تونس زوون" إضافة إلى أنو الحلقات السابقة قاعدة تتعدى... أكثر من هكة مجدي قاعد يطور في الإذاعة متاعو و حب يضيف برامج جديدة تتعدى على المباشر... يلزم لهنا نذكر إلي هو منفتح بشكل خاص على المدونين و الحصة الوحيدة توة إلي موجودة "يسرا زوون" تنشط فيها يسرا حول موضوع المدونات... المهم مجدي اقترح علي أنا و زيزو بش نعملو برنامج... قررنا بش نسميوه "تولك شوو" و من المفروض يتعدى أول مرة على المباشر نهار السبت هذا (9 متاع الليل وقت تونس).... طبعا البرنامج بش يتسجل زادة و يتحط كالعادة على مدونة الرديون... التعاون هذا بين التدوين و إذاعات الانترنت يظهرلي حاجة هايلة برشة توري إلي فمة أفكار أخرى حول العمل الإذاعي إلي تنجم تحدد مستقبل كيفية تقديم العمل الإذاعي...

فقط كليمة على برنامج "تولك شوو"... المرة هذية بش نحلو نقاش حول موضوع: المنتخب الوطني و المشاركة في كأس إفريقيا لكن أيضا موضوع الإعلامي الرياضي إلي قاعد يثير في عدد من التساؤلات كيف ما تمت الإشارة ليه في مدونة بودورو (هنا).... بش يشارك معانا في البرنامج بعض المدونين أو المشتغلين على الانترنت إلي مهتمين بالموضوع الكروي و لكن أيضا مدونين مش مغرومين بالضرورة بالكرة... من المفروض بش نعلنو على موضوع "تولك شوو" منو هكة على الفوروم متاع تونس زوون